Драмски и битолски театар и центрите за култура во Штип и во Охрид добија нова светлосна, сценска и тонска опрема

Драмскиот театар, битолскиот театар, Центарот за култура „Ацо Шопов“ во Штип и Центарот за култура „Григор Прличев“ во Охрид се првите четири национални установи каде што е доставенa современа техника, дел од проектот на Министерството за култура за набавка на сценска, светлосна и тонска опрема наменета за театрите.

Во рамките на тригодишниот проект, кој е во контекст на заложбите за унапредување на состојбите во областа на театарската дејност, предвидено е опремување на девет од постојните 15 театри во Република Македонија. До крајот на 2015 година ќе се осовремени и техниката во Театар Комедија, Театарот за деца и младинци, Центарот за култура „Марко Цепенков“ во Прилеп, Центарот за култура „Трајко Прокопиев“ од Куманово и Центарот за култура „Антон Панов“ во Струмица. Останатите театри во државата не беа опфатени со овој проект од причина што веќе добија нови современи објекти, како што се МНТ и велешкиот театар или, пак, се во фаза на изградба, односно реконструкција на постојните објекти, како што се случајот со турскиот, албанскиот и театарот во Струмица.

Дел од современата опрема се разни видови рефлектори, ламби, пултови, филтри и соодветни кабли за напојување, звучници, засилувачи на звук, аудиомиксери, микрофони, реквизити, како и друга сценска, светлосна и тонска опрема.

Набавката на новата опрема ќе влијае на квалитетот на продукциите и ќе ги зголеми техничко-технолошките можности на нашите театарски институции. Со овој проект на Министерството за култура уште еднаш се потенцира континуираниот интерес за унапредување на театарската уметност во Република Македонија, создавањето квалитетна понуда, но и услови за посетителите.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.