МЗТ Скопје вечерва ја продолжува новата авантура во Јадранската лига, а противник е реномираниот хрватски клуб Задар. Металците од Скопје посакуваат прв триумф во новата сала „Јане Сандански“, а во Аеродром повторно се враќа кошарката откако претходните две сезони МЗТ играше во салата „Борис Трајковски“. Премиерата на Јадранот сезонава беше со пораз од Мега Визура по продолженија.
– Не сум задоволен од играта на првиот меч, но очекувам нашата екипа и нашата игра од натпревар во натпревар да расте. Отсекогаш сум инсистирал на силна одбрана, но мора да признам дека тоа не е случај во моментов со МЗТ Скопје. Нападот можеби ги полни салите и нуди атрактивни потези, но одбраната носи победи, а одбраната и скокот носат трофеи– изјави искусниот тренер на МЗТ Скопје, Змаго Сагадин.
И тој е нов во клубот по ангажманот ова лето на клупата на МЗТ Скопје. Словенечкиот стратег има огромно искуство и квалитет, што му носи предност на македонскиот првак.
– Наша цел ќе биде денеска да примиме помалку од 70 поени затоа што верувам дека од друга страна ќе постигнеме повеќе од 70, а тоа е доволно за победа. Американецот Флоренс е еден од клучните играчи на Задар и него мора да го запреме, но, исто така, не смееме да дозволиме противникот да се расшутира од далечина. Во Задар кошарката е религија и очекувам тежок и неизвесен меч –додаде Сагадин.
Натпреварот се игра вечерва од 20 часот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
