Во почетокот на 1991 Македонија влезе со првиот повеќепартиски парламентарен состав. Во тоа време во Социјалистичка Република Македонија над претседателот на парламентот сѐ уште стои сликата на вечниот лидер на СФРЈ – Јосип Броз – Тито. Македонски претставници учествуваат во договорите на сојузно ниво за иднината на федерацијата, заглавена во економски колапс и движења за самостојност меѓу Словенците и Хрватите. Глигоров, кој е договорен за претседател на државата, заедно со босанскиот лидер Изетбеговиќ договара платформа за опстанок на Југославија. Во Македонија, пак, уште во јануари, се судираат главните стремежи меѓу двете големи политички опции.
Помногубројните пратеници на ВМРО-ДПМНЕ уште на конститутивната седница притискаат за декларација за сувереност на Македонија. Наследниците на Сојузот на комунистите сметаат дека главна точка и целосното внимание на оваа седница треба да е платформата за ју-самитот. Декларацијата за сувереност на Социјалистичка Република Македонија Собранието ја усвојува неколку дена подоцна, на 25 јануари. Два дена по декларацијата, Киро Глигоров е избран за македонски претседател. Љупчо Георгиевски по два дена е избран за потпретседател на Социјалистичка Република Македонија.
Во таа 1991 годината се влезе со економска состојба во која секој трети вработен е без плата, а секоја петта фирма не може да им исплати лични доходи на своите вработени. Повеќе од 170.000 вработени во Македонија не зеле плата за еден, два или за повеќе месеци. „Тие што добро работат или барем имаат средства за плати во моментот во Републиката се вистински исклучок“, наведува „Нова Македонија“. На федерално ниво, како застрашувачка се опишува превработеноста во федерацијата. Додека во 1990 година како вишок се прогласени 200.000 работници, за 1991 година се смета дека нивниот број ќе биде 350.000. Тогаш и се отвора прашањето: „без евиденција врз која основа, со каква квалификација и старосна структура се останува без работа и што станува со тие луѓе?“
Стапката на пораст на домашниот бруто-производ е во длабок минус од 6,2 проценти, а под нулата ќе остане уште неколку години. Тогашната војна на западните сили за да го ослободат Кувајт од ирачка окупација го чинеше македонското стопанство 371 милион долари. Штети доживеаја „Емо“, „Факом“, „Искра“, кои на тој пазар настапуваа во тесна врска со градежната оператива. МЗТ, ФАС „11 Октомври“, Мермерниот комбинат Прилеп, потоа дрвната индустрија стравуваа од ненаплатена стоковна размена. Дури шест текстилни претпријатија со околу 8.500 работници заминаа во стечај со ненаплатени сметки од Блискиот Исток. Но дури 60 проценти од долговите се од организации од Србија.
До крајот на годината пред окружниот стопански суд има 800 барања за стечај. Работниците штрајкуваат. Во штипска „Баргала“ штрајкуваат поради тоа што три месеци немаат плата, кичевските занаетчии протестираат пред затворање, а глад му се заканува и на добитокот. Дури и формирањето на првата, експертска влада ги дели насловните страници со вести за бран штрајкови насловени „Зад секоја порта има незадоволство“. Анкета спроведена од неделникот „Пулс“ го носи ставот на Македонците: „Нема куртул од сиромаштијата!“. Во неа „просечниот“ испитаник смета дека економската криза го допрела дното, дека живее просечно или под тоа, нема никакви дополнителни приходи и не знае што ќе прави ако остане без плата. Во иднина смета дека ќе му биде полошо.
Девалвацијата на тогашниот динар го поскапи бензинот. Со девизните заштеди над 1.000 германски марки граѓаните можеа да располагаат само ако ги претворат во динари или треба најмалку еден месец претходно да се најави дека ќе се подигнат од сметка.
Во екот на летото, пред пратениците доаѓа, па се повлекува законот со кој се воспоставуваат нови сопственички структури, а јавноста укажува на отворање можност за грабеж на општествениот имот. Министерството за здравство, пак, многу надежи полага во претстојниот закон за здравствена заштита. „Колку побрзо се донесе, толку побрзо ќе се разрешат напластените проблеми“, пишуваат весниците.
Всушност, со донесувањето на тој закон почнуваат криминални набавки во Фондот за здравство, кои и со интервенции во законот траат со години. Комисијата за јавни набавки, која подоцна го истражуваше периодот до 1998 година, дојде до сума од 200 милиони германски марки, односно сегашни 100 милиони евра. Се набавувале медицински материјали, енормно скапи апарати, биле градени објекти без документација, се вршело опремување, климатизација, се трошеле пари без распишување тендери, или каде што имало, учествувала само по една фирма, се набавувало без знаење и одобрение на надзорните и управните одбори – од Клиничкиот центар во Скопје до најмалите медицински установи низ Македонија, се водел бизнис со лекови со поминат рок.
Предреферендумскиот август дополнително ја поттикнува економската криза. Снабдувањето со нафтени деривати е минимално. Додека во Скопје има бескрајни редици за гориво пред бензинските пумпи, кон средината на месецот „Макпетрол“ прави распределба на дневниот дотур, со поголемо внимание на туристичките места и автопатот. Во меѓувреме, потпишан е договор за гасификација на Македонија меѓу директорите на „Макпетрол“ и на советскиот „Сојузгасекспорт“. Првите количества гас се очекуваат кон почетокот на 1994 година.
Се најавуваат и други инвестиции, кои никогаш не се остварија. Така, Вевчани требаше да добие фабрика за вода и за сокови. На 25 март, пак, од Охрид се објави вест „’Мекдоналдс‘ отвора ресторан во Охрид“. Претставникот ветил до три милиони долари инвестиција и вработување за 150 млади лица. Рокот за отворање е 10 месеци од договорот.
Новинарството во „тесното грло“ на плурализмот
– Живееме во време кога поседувањето информација претставува власт… Изборните резултати не ѝ дозволија на ниедна партија да има толкава моќ за да ги диктира правилата на игра и да оствари монопол над средствата за информирање. Однесувањето на голем дел од партиите не дава гаранција дека не би ја злоупотребиле дадената шанса. Во секој случај, ако ги оценуваме демократските процеси во Македонија, најголем чекор, можеби, е направен токму во сферата на информирањето – оценува во едно интервју Бранко Црвенковски, очекувајќи како единствен кандидат да ја заземе СКМ- ПДП по повлекувањето на Петар Гошев од тоа место.
За состојбата со медиумите во тој период сведочат и весниците. Локалните медиуми се оставени на цедило, без пари речиси цела година, додека, пак, во колумна Ѕвездан Георгиевски вели дека новинарите си обезбедиле место на „дното на табелата“.
„Тоа најдобро го покажаа Деновите на македонското новинарство и на македонските новинари. Беше очигледно дека на секои сто учесници на средбата имаше по двајца новинари, што ќе каже дека на еден новинар имаше по педесет политичари. Со други зборови, македонското новинарство никогаш не било толку независно и суверено како денес“, пишува колумнистот, па зборува за состојбите во другите републики каде што биле избркани директори, уредници, новинари, дека во Хрватска и во Словенија главниот критериум за квалитет на новинарите е нивната партиска припадност или минатиот антикомунистички стаж. Во колумната на неколку дена пред да се формира владата таа 1991 година, пишува: „Не, нема место за страв. Во Македонија не се случува тоа. Така барем рече Стојан Андов на истите тие Денови на македонското новинарство. Ние, имено, сѐ уште немаме влада“.
На 20 март 1991 година е избрана македонската влада
Нова Македонија, на 13 февруари1991 година „неофицијално“ се објавува дека нема решение за мандатор за новата влада, а дека кандидатите на ВМРО-ДПМНЕ биле неприфатливи за Глигоров. „Сосема неофицијално се дознава дека, наводно, претседателот на Републиката, Киро Глигоров, меѓу личностите што беа предложени за претседател на владата не нашол соодветна личност. Во аргументираното образложение, како што дознаваме, Глигоров ги навел и причините зошто не се прифатени предлозите на ВМРО-ДПМНЕ. Тоа е направено врз основа на разговорите со кандидатите и врз увидот во стручната и целата активност на понудените кандидати“. На 20 март Глигоров му го доделува мандатот на Никола Кљусев и со 83 пратенички гласови „за“ и 17 „против“ се избира за македонската влада. Покрај претседателот има тројца потпретседатели, 15 ресорни министри и четворица министри без ресор. Декларацијата и платформата се темел врз кој ќе се гради новата филозофија на правниот и на економскиот систем на Македонија. Владата ќе дејствува натпартиски.
Како сведоштва на состојбите во тогашните медиуми – изданијата на НИП и државната РТС, остануваат неколку написи. Кога во првото тримесечје на 1991 година ВМРО-ДПМНЕ ја нагласи потребата од професионално платено ангажирање за време на пратеничкиот мандат, новинарот Милан Банов, подоцна уредник на неколку други приватни печатени медиуми, во „Нова Македонија“ се осврна на ова барање.
„Сосема е нормално и човечки во овие тешки и сиромашни времиња некој да е загрижен за својата егзистенција, па оттука и наидува на разбирање и желбата на секого да заработи повеќе. Во таа смисла не може да се стави забелешка ниту на пратеничката група на ВМРО-ДПМНЕ на нејзиното барање пратениците за времетраењето на мандатот да бидат професионално ангажирани и личниот доход да го остваруваат во парламентот, особено што не е непознато каква е социјалната структура на најмногубројната партија во Собранието“.
Подолу во освртот насловен „Или пари или шпиони“ Банов додава: „Без претензии да правиме некоја поопсежна анализа на ова соопштение, кое според својата, најблаго речено, несериозност објективно нѐ спречува во тоа, сепак, не можеме, а да не се осврнеме барем на две работи…“
Ова не е единствено „остро перо“ кон партијата што освои најголем број пратеници на изборите. Во изданијата од јануари се оценува: „Постоењето на ВМРО е историски апсурд“, или, пак, „Антимакедонските белези на ВМРО-ДПМНЕ“. Интервјуто со Борис Змејковски, генерален секретар на партијата, е насловено: „Не сме терористичка партија“, а главни акценти се ставени на тоа дека тој бил осуден на три месеци затвор пред 12 години, како и: „Немаме своја полиција“.
Во тој амбиент Македонскиот национален фронт, односно Демократскиот сојуз –Партија на земјоделците на Македонија, заедно со ВМРО-ДПМНЕ и МААК, соопшти дека заради нецелосното и искривено информирање на јавноста од страна на Македонската телевизија и печатот… заземен е став да се почне со издавање весник на Македонскиот национален фронт, а наскоро да се обезбеди и сопствено радиостудио.
Љупчо Георгиевски, лидер на ВМРО-ДПМНЕ и потпретседател на претседателот на државата, кон крајот на март 1991 година испрати отворено писмо до директорот на НИП „Нова Македонија“, Панде Колемишевски. Во него лично го прозива, додавајќи: „Доста ми е од монопол во средствата за јавно информирање, доста ми е од лагите интригите инсинуациите, болшевичките методи на дисквалификација, лазовизмот, чијшто кум сте вие господин Колемишевски“. Во дел од писмото ги наведува и тие што со своите текстови го поттикнале на оваа реакција. „… За да не останам необјаснет, затоа што веќе утре чувствувам дека вашите загарчиња од типот на Милан Банов, Бранко Тричковски, Шољаковски и уште два-тројца од истиот тој калибар, можат да напишат половина страница од вашиот приватен весник ’Нова Македонија‘….“.
„Извинете господин Колемишевски, меѓутоа не можам да му верувам на човек кого го поставил директно Лазар Колишевски, не можам да му верувам на човек што во последните две-три години како директор беше најпослушен слуга на режимот и го фалеше еднопартизмот, комунизмот“, додава Георгиевски во отвореното писмо во кое бара оставка од Колемишевски од принципиелни причини. До тоа не дојде. Новинарите одговорија по своја мера.
Распадот на Југославија и македонските војници
На 6 мај се слеа македонска крв во туѓ националистички судир. Во Сплит е убиен Сашко Гешовски, прва од низата македонски жртви во конфликтот во поранешна Југославија. Почетокот на летото навести сурова и долготрајна војна на териториите на Србија, Хрватска и на БиХ. Македонија со ништо не придонесе за ескалација на кризата, а мобилизацијата на резервниот состав на ЈНА ја зголеми напнатоста. Додека беше ставен мораториум на разговорите на федерално ниво, македонските мајки бараа децата – војници во ЈНА да бидат повлечени од Словенија и од Хрватска.
Во собраниските дискусии СДСМ оценува дека Македонија се нашла меѓу едностраните одлуки на Словенија и на Хрватска и тврдиот став на Србија и на Црна Гора за модерна федерација, но и дека не ѝ останува друго освен да ги поддржи одлуките на Претседателството на СФРЈ.
„Комунистите се преобразија во социјалдемократи“
На 11. конгрес на СКМ-ПДП избран е нов претседател. Бранко Црвенковски го замени Петар Гошев. Тоа е младото момче од раководните партиски структури, пратеникот што бараше на конститутивната седница на парламентот прво да се интонира југословенската химна, па потоа македонската. За време на втората, пак, остана да седи в клупа. СДСМ е правен и политички наследник на поранешната Комунистичка партија на Македонија и на Сојузот на комунистите на Македонија. Гошев во говорот прашал:
– Можат ли југословенската криза да ја решат референдумите на народите или референдумите на граѓаните, одржани во секоја република?… Ако успеат да ја растурат во историјата ќе биде запишано: под водството на Јосип Броз – Тито настана култот на личноста, комунистичката заблуда, многубројните неправди , беше формирана Југославија од шест народи, од шест републики. А под водството на неговите наследници, независно од тоа дали вреди да бидат споменати или не, се распадна Југославија.
Од ВМРО ДПМНЕ, пак, сметаа дека никој освен Македонија не го почитува сојузниот Устав, а и дека по трите месеци мораториум, Европа ќе ги признае Словенија и Хрватска. Македонија мора да постапи по Декларацијата и да го искористи моментот за донесување уставни акти и да издејствува меѓународно признавање.
Во една таква атмосфера, Црвенковски за неделникот „Пулс“ цврсто стои на ставот дека е невозможна поинаква разрешница на кризата, та дури и со интервенција на НАТО ќе се најде некаква средина и мека федерација на новите југословенски држави. „Пулс“ ја нагласува неговата оценка за цврстиот став на Словенија. „Неколку претставници на актуелната словенечка власт, на гостување во Австрија, изјавиле дека отсекогаш себеси се сметале за дел од Австроунгарското Царство и дека не би имале ништо против повторно да станат дел од тоа опкружување. Тоа говори за една тенденција во која може да се повлече паралела со ситуацијата кај нас. Да речеме, однесувањето на ДПМНЕ за некои работи, со тоа што таму џебот ќе биде многу пополн, а тука напротив.
Ако Словенците се подготвени по цена на германизирање, по цена на губење на своите територии, а со намера индивидуално, како граѓани, да влезат во Европа со подобар економски статус и без желба да го зачуваат својот идентитет, тоа е друга работа“, вели Црвенковски.
Сепак, во јули, Црвенковски и СДСМ немаат јасно заземен став за македонските војници и нивното учество во борбите во Југославија.
Референдумското прашање со додаток
Меѓу актерите за формирањето на референдумското прашање е и Никола Поповски. Според негова колумна од пред неколку години, претседателот Глигоров кај себе повикал неколкумина од партиите „врз кои можел да се потпре“.
„На состанокот се дискутираше по три сродни, но тешки прашања за референдумот: дали, кога и со кое референдумско прашање? Колку што се сеќавам, на тој состанок немаше големи разлики и по повеќе часови разговори, се дојде до единствен заклучок дека: 1. референдум мора да се одржи и дека за тоа ќе се оди пред Собранието со конкретен предлог за што ќе се бара поддршка и од ВМРО-ДПМНЕ и од ПДП; 2. референдум да се одржи најбрзо колку што може, бидејќи Уставот веќе беше во фаза на подготовка, а тој термин логично беше да се одреди уште во првата недела по завршувањето на одморите и почнувањето на учебната година. Изборот беше меѓу 1 и 8 септември, па така се дојде до датумот – 8 септември, како посоодветна за поголем одѕив; 3. референдумското прашање мора да се состави и предложи заедно со одлуката за референдум, за што, всушност, се дискутираше најдолго и се дојде до решението, кое е познато и кое требаше да ги содржи сите елементи за успешен референдум и недвосмислено изјаснување за самостојност на Македонија. Околу 14 часот се даде пауза за да се состави прецизниот текст на референдумското прашање. Таа задача ни припадна на мене и на Зоран Крстевски. По околу еден час работа, се вративме со готов и прецизен текст со сите детали и тоа беше последното околу што се постигна целосна согласност на тој состанок. Понатаму е познато за јавноста“, пишува Поповски. Оттука Никола Поповски ја реализира желбата во референдумското прашање да стои нелогично дополнение за повторен сојуз со југословенските држави.
Одлуката за распишување референдум за независност на Република Македонија е донесена на 6 август. Подготовката за референдумот се прави во моменти на голема поделеност во парламентот во кој се спори дали референдумот да се распише откако Собранието ќе прогласи независност, или, пак, референдумското изјаснување ќе биде основа за одвојувањето на Република Македонија. Притоа, се работи на нов текст за Уставот. Македонија пред Република го брише Социјалистичка. На таквата поделеност се надоврзува и отсуството на двете партии на Албанците во Македонија, кои имаат низа барања што почнаа да ги поставуваат уште од подготовките за редовниот попис во федерацијата. Грција уште пред референдумот ја засилува антимакедонската кампања. Весниците пишуваат: „Грција им се заканува на сите што ќе ја признаат Македонија“. „Веднаш по евентуалното прогласување на независна Македонија, Грција да ја затвори границата и да ги прекине дипломатските односи со земјите што би ја признале како самостојна држава“, се додава. Голема збрка во Грција предизвикува пишувањето на американскиот печат. Исто така, и причината за престојот на министерот Малески во САД. Грчките сознанија велат дека САД заедно со другите ќе ја признаат и „скопската република“ и нејзиното право да се нарекува „Република Македонија“. Но тоа не е сѐ. Во следните десетина денови, грчката армија ќе има големи маневри на границата. „Токму тогаш почнува големата воена вежба близу границата наречена ’Филопос‘ – а во неа учествуваат оклопна дивизија, пешадиски артилериски и специјални единици на армијата и авиони и хеликоптери на грчкото воено воздухопловство“, пишува „Нова Македонија“ на два дена пред референдумот.
Андов за „Република“: Лажеа дека сум во Грција
На фотографиите од прославата на плоштад по референдумот забележително е отсуството на неколкумина политичари, ги нема Црвенковски, Тупурковски…
– Ни јас не сум таму! За мене беше важно да успее референдумот. Љупчо Арсовски, дипломатот, кој тогаш работеше во Грција, ме извести дека референдумот ќе предизвика сериозни реакции во Грција и затоа што побрзо треба да се направи некој контакт со грчките авторитети. Првата можност беше 9 септември, еден ден по референдумот. Премиерот Константин Мицотакис отвораше саем во Солун. Грците не сакаа да се видат со никој од извршната власт, ниту со Глигоров, сметавме дека е соодветно јас да одам. За ова знаеја и Глигоров и Кљусев. Во Грција влегов на 9 септември, а на денот на референдумот прво бев во Скопје, па во Кавадарци, па во Дојран, што поблиску до Грција. Во Солун стигнавме рано, пред да се затвори безбедносниот прстен околу градот…… За малку ќе се сретнев и со Мицотакис, но во последен момент ја избегна средбата….. Инаку, ќе го убедев Мицотакис дека очекуваме разбирање и поддршка…. А, зошто Тупурковски или Црвенковски не биле, тоа не знам. Можеби и тие биле низ државата. Црвенковски во Дебарца, не знам, никогаш не сме разговарале – вели Андов во интервјуто за првиот број на „Република“.
Референдумот на 8 септември помина со огромно мнозинство од дури 97,9 проценти од гласовите. На прославата на плоштадот, кој денес го носи името „Македонија“, го нема Бранко Црвенковски. Го нема ниту Стојан Андов, ниту, пак, Васил Тупурковски. Според сеќавањата на првиот министер за правда Ѓорѓи Наумов, и Киро Глигоров дошол по упорно инсистирање на Никола Кљусев. Прославата е направена на 8 септември ноќта за да се избегне коинциденцијата следниот ден, 9 септември, кога Бугарија го славеше денот кога комунистите ја зазеле власта во земјата.
На 17 ноември е донесен Уставот на Република Македонија, за кој уште на 7 мај Глигоров упати предлог за донесување нов Устав. Овој Устав е прв по прогласувањето на сувереноста и на самостојноста.
Од Костур и од Лерин, Мицотакис поставува услови за добрососедство – Македонија да се декларира како повеќенационална мешаница, а вели дека нејзините денешни жители немаат никаква врска ниту со античките ниту со современите Македонци, кои се – Грци.
Во новогодишното интервју во „Нова Македонија“, премиерот Никола Кљусев вели: „По политичката – економска самостојност“. Сепак, додава дека не треба да се прават илузии дека општествената сопственост веднаш ќе се претвори во приватна.
Ратка Димитрова, пратеничка во првиот парламентарен состав
„…. Херој на независноста е и првиот премиер на самостојна Македонија, Никола Кљусев, поради тоа што алармиран од договорот Милошевиќ – Мицотакис за Македонија, кои бараа состанок со претседателите на Романија и на Бугарија во отсуство на Македонија, веднаш отпатува во Софија и во Букурешт и го осуети нивниот план. Поради тоа што во најстресното време му даде одврзани раце на министерот Мијалков да постапува спрема ЈНА. Поради топлината и љубовта што зрачеше од него при секое обраќање кон народот.
Херој на независноста на Македонија е и првиот министер за внатрешни работи на самостојна Македонија, кој при најголема опасност, и лична и на луѓето за кои одговараше, ја одзеде документацијата за регрутите и со тоа ѝ го зададе најтешкиот удар на ЈНА, со што и, дефинитивно, ја деморализира. Тука не сакам да го одминам шефот на полицијата на град Скопје, Зафировски, кој беше негова десна рака во тоа време“, пишува во „Утрински весник“ на 6.9.2011 година.
Загинувањето на Јордан Мијалков
На 19 декември во сообраќајна несреќа животот трагично го загуби првиот министер за внатрешни работи Јордан Мијалков. Мијалков, кој беше член на експертската влада на Република Македонија на премиерот Никола Кљусев, без никаква придружба, со возачот тргнал за Белград, на покана на тогашниот сојузен министер за внатрешни работи Петар Грачанин. Требало да има состанок на републичките министри за внатрешни работи со Грачанин.
Незгодата се случила во јужна Србија, кај Врање. Според извештаите од српските власти, паѓало снег, а возачот на Мијалков возел брзо. При разминување со друго возило, автомобилите се удриле, службениот автомобил се извртел, по што неколку пати се удирал во оградата. Властите увиделе грешка на возачот на министерот.
– Јордан Мијалков не починал од ударот. Тој излегол од автомобилот, викал за помош. Остана нејасно зошто српските полициски власти не го пренеле директно во Скопје, на специјалистички прегледи, или барем да го однеле со хеликоптер до белградските клиники. Место тоа, го маткале низ Врање и човекот починал од болки од скршените коски, а не од повреди на витални органи, зашто при обдукцијата не биле пронајдени такви. Но на овој момент не се обрнало внимание во тогашната куса истрага во Србија, која беше прифатена и од владина комисија во Македонија – раскажува за „Вест“ во 2009 година тогашен висок полициски функционер.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Поврзани вести
-
Фељтон: Црните страници на УДБА – Лустрацијата – недовршен процес (Том IX)
-
Груевски: Грантови за компаниите кои ќе ги рестартираат фабриките жртви на транзицијата
-
Димовски: Државата ќе помогне да се рестартираат фирмите жртви на транзицијата
-
Фељтон: Црните страници на УДБА – Борци за независна и обединета Македонија (Том VII)