Капитенот на Атлетико Мадрид призна местенка во Шпанија

Капитенот на шпанскиот првак Атлетико Мадрид, Габи Фернадес Аренас, призна во шпанскиот суд дека учествувал во нелегални фудбалски работи, односно дека учествувал во местење на исходот од дуелот меѓу Леванте и Сарагоса.

– Направив сѐ што бараа од клубот – изјави Габи, играч што во 2011 година играше за Сарагоса. Тогашниот негов клуб го победи Леванте со 2-1 и се спаси од испаѓање на неверојатен начин со 4 победи во последните 6 рунди. Меѓу поразените во тој циклус беше и Реал Мадрид, но сега се открива дека не било сѐ легално.

Во финишот на таа сезона настрада Депортиво ла Коруња, клуб што испадна и ја загуби трката со препородената Сарагоса. Габи потоа се пресели во Атлетико Мадрид, стана и репрезентативец на Шпанија, но сега се соочува со казна за местење. Вчера тој не играше за „јорганџиите“ против Јувентус во меч од Лигата на шампионите.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.