Вечерашниов митинг во Струмица на СДСМ не помина како што очекуваа во партијата. Од сликите се гледа дека плоштадот е половина празен. Ова е втор митинг на партијата годинава, откако на 16 јануари пред присутните Бранко Црвенковски порача дека „Враќање во парламентот нема, единствен излез од оваа криза се предвремени парламентарни, фер избори… влогот е голем и од битката нема повлекување“.
Се чини дека погазувањето на зборот даден пред неполни два месеци ги одврати граѓаните.
Лидерот на опозициската СДСМ Бранко Црвенковски, вечерва од Струмица, уште еднаш го убедуваше партиското членство дека издејствувал до 1 септември да се донесе одлука за превремени избори. Црвенковски му порача на премиерот дека од предвремени избори немало ни Господ да го спаси.
– Датумот е познат, најдоцна до 1. септември, а зошто Груевски инсистираше во документот да не влезе зборот предвремени, бидејќи не сака меѓу своите да го сруши митот за самиот себе, а дал збор дека до јуни ќе го реши спорот со името. Да не го чекаме септември, еве шанса во еден ден вашиот глас да се брои двапати, предвремени парламентарни избори ќе има. Ќе покажеме дека цела Македонија сака да биде како Струмица, порача Црвенковски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
