Смртоносната ебола зема сѐ поголем замав во Африка

Смртоносниот вирус ебола со енормна брзина се шири низ западна Африка, а бројката на починати рапидно се зголемува. И покрај очајните обиди на здравствените власти да ги изолираат заразените, тоа засега не им оди од рака. Само во Либерија, каде што се наоѓа жариштето на вирусот, има повеќе од 1000 заразени, но повеќе случаи се пријавени и во Сиера Леоне и во Гвинеја. Од февруари досега починале над 670 лица, а меѓу нив се и неколку доктори кои се заразиле при напорите да им помогнат на несреќните луѓе.

САД соопштија дека со ебола се заразил еден американски доктор кој работел во болница во Монровија, како и една американска хуманитарка која се заразила на истото место. Оваа вест предизвика дополнителна паника бидејќи се работи за медицински лица кои работеле во релативно добри и заштитени услови, што, пак, покажува дека вирусот навистина зел голем замав.

– Еболата се прошири низ Либерија, Гвинеја и низ Сиера Леоне и покрај сите наши напори. Не можам да бидам оптимист сѐ додека не биде целоно искоренета во сите три земји. Сепак, мислам дека ситуацијата се подобрува – изјави претседателот на Гвинеја, Алфа Конге.

Владата на Либерија ги затвори сите гранични премини, забрани секакво јавни собири и воведе строги здравствени мерки, но еболата упорно се шири. Прв случај на заболен веќе е пријавен и во Нигерија. За оваа болест сѐ уште нема лек, а завршува со смрт во 90 проценти од случаите. Се манифестира со силна треска, болки во мускулите и обилни внатрешни и надворешни крвавења. Се пренесува преку допир со заболен човек или животно. Првпат се појавила во 1967 година во ДР Конго.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.