– Процесот на екстерно тестирање, кој почна денеска и ќе трае до 10 јуни се одвива успешно, без пријавени технички проблеми на системот или проблеми од организациски аспект – оцени денеска министерот за образование и наука Спиро Ристовски.
– Денеска почна екстерното тестирање на учениците од четврто одделение во основното образование до трета година во средите училишта. Првиот, од вкупно два предметa, денеска го полагаат 77.000 ученици во сите 680 основни и средни училишта. Предност им е дадена на осмоодделенците поради роковите за упис во средните училишта. Според податоците на Државниот испитен центар, чиишто повикувачки центри се активни во текот на целиот процес на тестирањето, тоа успешно почна во сите училишта во Република Македонија – рече Ристовски.
Исклучок е подрачното училиште „Михајло Граменов“ во село Малино, општина Чучер – Сандево каде што тестирањето е одложено за утре поради прекин во снабдување со електрична енергија, проблем на чиешто отстранување работат екипи на ЕВН.
До 13 часот 370 училишта испратиле извештаи дека кај нив завршено тестирањето, и нема нема пријави за ниту еден технички проблем во системот во ниту едно училиште ниту, пак, некаков проблем од организациски аспект. До 14 часот тесирањето е завршено за 50.000 ученици.
– Ова е очекуван резултат по интензивните подготовки и координацијата со сите училишта, како и унапредувањето и надградувањето на системот. Процесот го олеснува и фактот што овие ученици се тестираат по втор пат со исклучок на оние кои се четврто одделение и првпат екстерно се тестираат. Може да констатираме дека екстерното тестирање се спроведува и реализира успешно. Генерален впечаток е дека сите ученици во процесот сериозно ја сфаќаат својата обврска за придонес кон неговото непречено и квалитетно спроведување. Наша основна цел е никој да не биде оштетен и затоа во целост секојдневно во наредните неколку дена на дневна основа ќе имаме координација и следење на текот на екстерното тестирање, изјави министерот за образование.
Ристовски истакна дека во две училишта имало мало задоцнување во почетокот на тестирањето, но, како што рече, станувало збор за прекин на интернет, што како и прекинот на снабдување со електрична енергија не се фактори кои зависат од МОН.
– Од друга страна, имаме училишта во кои има неколку полагања во текот на еден ден поради големиот број ученици и ниту едно од нив не пријавило каков било проблем, рече Ристовски.
Тој нагласи дека екстерното тестирање е исклучително обемен процес во којшто се вклучени безмалку 200.000 ученици.
– Само во текот на денешниот ден се вклучени 77.000 ученици. Денеска е најголема бројката на вклучени ученици и се очекува така да биде и во четврток поради тоа што во овие денови се вклучени сите осмооделенци во државата на кои им беше дадена предност за да може да се подготвуваат за уписи во средните училишта – рече Ристовски.
Истакна дека доколку имаат забелешки на резултатите од екстерното тестирање родителите и старателите или самите ученици може во рок од три дена да поднесат приговор до Државниот испитен центар.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
