ВМРО-ДПМНЕ и СДСМ се судрија со изборните програми. Напишаното и составеното го издаде и тоа што се случувало во партиите. Не е во прашање само квантитетот, туку и квалитетот. 384 страници наспрема 100 – тоа е соодносот само на квантитетот на двете програми иако реално програмата на СДСМ тежи помалку од 70 страници, што би дало сооднос 5:1. Поголемиот проблем е во напишаното. Додека партијата на Груевски нуди конкретни проекти, со рокови и пресметки, кај Заев доминира „борбата за слобода“. Уште еден куриозитет – името на ВМРО-ДПМНЕ почесто се споменува во програмата на СДСМ отколку во програмата на владејачката партија.
Kоинциденции не постојат, но случајно или не, кај ВМРО-ДПМНЕ и СДСМ се совпаднаа броевите на местата на гласачките ливчиња од баражот во ДИК и соодносот на страниците на програмите. На ливчињата ВМРО-ДПМНЕ доби број 5, СДСМ број 1. Таков е и соодносот на квантитетот, а според аналитичарите и на квалитетот, на програмата – 5:1. Искрено, на Бихаќка навистина како да не се мачеле со создавањето на програмата за изборите. Наспрема огромната програма, која е одраз на машинеријата на ВМРО-ДПМНЕ – тешка цели 384 страници, СДСМ, буквално, излезе со мини-програма од „заокружени“ 100 страници, од кои –ако се одземе воведот, маргините и големиот простор за секој „столб“, не се собираат ниту 70 страници.
-И самиот лидер Заев призна дека не планирале сега да дадат предизборна програма затоа што не планирале ниту избори, а изненадени, очигледно, останаа и творците на пишаното на познатата уличка, кои затечени склепаа нешто што треба да личи на програма. Историски гледано, програмата и онака никогаш не била јака страна на партијата во која работите секогаш се решаваа во од и стихијно. Новиот стил на игра наметнат од противниците тешко станува дел од социјалдемократските елитистички навики за „лезет“ изборен настап. По можност со кафенце и со муабет, но без напор и стресови, како неподобни и непознати за станарите на оваа зграда од Бихаќка. Брзината на креацијата ја издаде и самото име на партиското и програмско лого, кое, за жал, излезе чиста компилација и плагијат на предизборен слоган на најголемиот ривал, пишува Република.
Познавачите на состојбите се согласуваат за неспорните разлики во конципирањето на двете програми на партиите кои алудираат на власта во државава. Проф. д-р Тања Карамишева-Јовановска од Правниот факултет во Скопје за Република вели дека проблемот на СДСМ е што ВМРО-ДПМНЕ со своето досегашно дејствување направи и наметна стил на политика и работа кои ја сменија претходната перцепција на граѓаните, стил во кој партијата од Бихаќка тешко се снаоѓа. СДСМ, едноставно, не може да се носи со таквиот победнички стил.
-Не треба да си врвен познавач на политичките прилики и состојби во Македонија за да можеш да направиш споредба меѓу тоа што го нуди ВМРО-ДПМНЕ како изборна програма, од една страна, и тоа што го нуди СДСМ, од друга страна. Не е во прашање само квантитетот, туку и оригиналноста и соодветноста на програмата на македонските услови, вели Каракамишева-Јовановска.
И доцент доктор Иванка Додовска од Правниот факултет за неделникот смета дека кампањата за предвремените парламентарни избори почна во една интересно поларизирана политичка атмосфера. Тоа што го сочинува првиот впечаток во однос на самиот старт на предвремените парламентарни избори во Македонија, според неа, е во сосема различниот приод во секој поглед со кој партиите одлучија да ги претстават своите политички програми пред граѓаните. Програмата на СДСМ ја оценува како евтин политички памфлет, наспрема сериозната и комплексна програма на ВМРО-ДПМНЕ.
Целиот текст може да го прочитате во најновото издание на неделникот Република кое излегува денеска 11.04.2014
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
