Веле Самак: Холандската компанија „Антура“ од Кочани ќе вработи 300 лица

Антура од Кочани ќе продава расади на орхидеи на странските пазари, првенствено на западно-европските. Инвестицијата се проценува на 6 милиони евра…, објави МРТ. На самиот влез на Кочани речиси една до друга ќе се простираат погоните на американската компанија Амфенол и холандската Антура. Багерите, машините, камионите, интензивно го рамнат теренот каде што Холанѓаните ја градат фабриката за украсно цвеќе. Со инвестицијата која се проценува на 6 милиони евра, ќе бидат вработени 300 лица.

-Кога се зема во предвид оваа инвестиција, заедно со американската Амфенол, гледаме дека има голема перспектива во Кочани, за вработување, за иднината на младите. И за дополнително вклучување и на домашните компании во вакви проекти, истакна Веле Самак- министер без ресор за привлекување странски инвестиции.

Антура од Кочани ќе продава расади на орхидеи на странските пазари, првенствено на западно-европските.

Плановите се до крајот на летото да завршат градежните работи во холандската фабрика, а по обуката на менаџментот во Холандија да започне и пробното производство.

Веќе од крајот на годината за странство треба да заминат првите орхидеи од кочанската почва. Градоначалникот, Ратко Димитровски планира искористување на постојните напуштени погони, но и урбанизација на нови индустриски зони за идни инвеститори.

-Правиме напори да главниот проблем во Општината, невработеноста, го сведеме, ако ништо друго, туку на ниво на Македонија, ако не и подолу, вели Ратко Димитровски, градоначалник на Кочани.

Во кочанскиот регион невработени се над 6.000 граѓани, најголемиот дел од нив се над 50 годишна возраст.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.