Баерн и Атлетико Мадрид со капитална предност од гостински терен во ЛШ (видео)

Европскиот шампион Баерн Минхен со капитална предност од два гола се враќа од Лондон по првиот натпревар од Лигата на шампионите против тимот на Арсенал. Баерн успеа да слави со 2-0 со головите на Тони Крос и Томас Милер во вториот дел од натпреварот.

Во првиот дел двата тима не успеаја да реализираат удари од белата точка. Најпрвин голманот на Баерн, Мануел Ноер, успеа да го скроти ударот на Месут Озил во деветтата минута, а потоа Давид Алаба ја погоди само стативата откако беше исклучен првиот голман на Арсенал, Шчесни по стартот над Робен во сопствениот шеснаесетник.

Во продолжението Баерн ја искористи предноста од играч повеќе на теренот, ја презеде иницијативата и успеа да победи, со што има голема предност пред реваншот во Минхен.

Милан и Атлетико Мадрид во вториот натпревар вечерва одиграа цврст натпревар на „Сан Сиро“. Милан беше поблиску до победата по неколкуте шанси кои не успеа да ги реализира. Кака и Балотели успеаја да ја погодат конструкцијата на голот.

Во продолжението на натпреварот по еден изведен корнер најдобриот играч на Атлетико, Диего Коста, успеа со глава да ја погоди мрежата на седумкратниот европски шампион Милан и успеа да го однесе својот тим до победа од 1-0.

Со играта што ја прикажа Милан на вечерашниот натпревар, покажа дека е солиден тим кој нема лесно да се предаде на реваншот во Мадрид.

Арсенал – Баерн Минхен 0-2 (Крос 54, Милер 88)

Милан – Атлетико Мадрид 0-1 (Коста 83)

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.