Глобалниот настан, Меѓународна недела на продавачи на уличен печат, и годинава ќе го слави претприемачкиот дух и ќе го дигне гласот на ранливите групи во борбата против сиромаштијата. Одбележувањето започнува на трети февруари и ќе трае до крајот на неделата (седми февруари) а во фокусот ја става борбата на луѓето на маргините преку работа во улично списание или весник и преку развој на своите вештини да ѝ застанат на патот на бедата, но и да го свртат вниманието на јавноста кон социјалните проблеми.
Уличните списанија и весници во светот (во Македонија единствено е „Лице в лице“) веќе две децении се двигатели на глобалното движење кое се бори со сиромашијата, бездомништвото и со социјалната исклученост, овозможува нови работни места и им помага на маргинализираните да станат активни граѓани.
Со почетокот на економската криза, рапидно се зголеми и бројката на бездомници и лица што живеат на работ на егзистенцијата и таа во Европа стигна до 26 милиони. Мисијата на уличните списанија и весници е да ја намали оваа бројка и нивната широка распространетост низ Европа, а и низ светот, овозможува не само приход за маргинализираните поединци вклучени во продажбата на весниците и списанијата, туку има силна улога и во враќањето на самодовербата на социјално исклучените луѓе, подигнување на свеста кај граѓаните и кај компаниите.
Програмите на уличниот печат се фокусираат на работата како клучен елемент во социјалната инклузија и нивната девиза е дека сите актери во општеството (Влада, компании, социјални бизниси, невладини организации, граѓаните) треба да работат заедно за да создадат околина во која исклучените луѓе ќе можат да го искористат својот потенцијал и да се здбијат со можноста да заработуваат, да почувствуваат припадност и да станат независни.
Единственото улично списание во Македонија претставува извор на приход за околу 40 продавачи- бездомни лица, социјално загрозени граѓани, младинци од улица и лица со пречки во развојот кои го нудат „Лице в лице“ на повеќе локации во Скопје, Неготино, Струга и во Битола.
Според податоците на Меѓународната мрежа на уличен печат (ИНСП) со седиште во Глазгов, вкупната бројка на продавачи на кои им помогнало глобалното движење на уличниот печат низ годините е над 250.000. Минатата година, во рамки на Меѓународната недела, продадените примероци достигнаа читателска публика од 700.000 луѓе во светот, а повеќе од 200.000 беа вклучени во коментари, споделувања и интеракции на социјалните мрежи. Настанот доби публика од 2,8 милиони луѓе.
Членки на ИНСП се 122 улични изданија од светот, кои се издаваат во 42 различни земји, во над 600 градови. Во еден момент на улиците низ светот се околу 14.000 продавачи, а вкупната зарботувачка која ја направиле тие продавајќи ги уличните изданија низ светот е 26 милиони фунти на годишно ниво.
Создадена од повеќе програми, настани и активности, Меѓународната недела ќе ја одбележат уличните изданија, членки на Меѓународната мрежа на уличен печат (ИНСП), меѓу кои е и „Лице в лице“.
Деветтиот број на активистичкото улично списание ќе излезе токму во рамки на Неделата, на 7 февруари, за кога „Лице в лице“ организира мултимедијален настан на кој ќе учествуваат повеќе македонски уметници.
Преку фотографи, книжевност, музика и перформанс на тема „Улица“, публиката ќе биде повикана да ги сподели своите видувања и асоцијации од секојдневието низ улиците.
Неделата на продавачи се одбележува вторпат, а исто како и лани, се случува во првата недела од февруари.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
