Македонската ракометна репрезентација го загуби првиот контролен меч пред настапот на Европското првенство во Данска, а подобри од нас беа Словенците со 31-25, во натпревар одигран во Трбовље.
Избраниците на Ивица Обрван добро го почнаа мечот и поведоа со 6-2, но до крајот на првиот дел, домаќините се вратија во игра и израмнија на 12-12, што беше резултат на полувремето.
Тоа како да им даде полет на Словенците, кои играа подбро во продолжението, па на крајот славеа со убедливи 6 гола разлика.
Кирил Лазаров со шест гола беше најефикасен во нашата репрезентација, а Дејан Манасков е веднаш зад него со четири погодоци, Златко Мојсоски и Ванчо Димовски беа стрелци на по три гола.
Проблем за нас е што и Пецаковски, кој е еден од ретките леви бекови во составот се жали на повреда на рамото, но до 12 јануари и премиерниот меч на ЕП против домаќинот Данска има доволно време за санирање на повредата.
Ова беше единствениот контролен натпревар планиран за време на подготовките во Пореч. Нашиот национален тим ќе се врати во Македонија, каде ќе одигра пријателски натпревари со Србија и со Црна Гора.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
