На денешната средба помеѓу премиерот Никола Груевски и членови на Владата со бизнисмени од Комората на Северозападна Македонија е констатирано дека годинава што изминува на економски план и за Владата и за бизнис заедницата е добра. И двете страни очекуваат добрата соработка што се остварила досега да продолжи и следната година.
– Ова беше добра економска година каде заеднички секој го сработи својот дел. Владата преку општиот амбиент за работа, преку обезбедување евтини кредити, преку навремено раздолжување кон стопанството и плаќање на обврските и сите други политики и мерки, а бизнис секторот со својата креативност и претприемачкиот дух успеа да ја помине добро годината – изјави вицепремиерот и министер за финансии Зоран Ставрески по завршување на средбата.
Бизнис секторот на средбата од Владата побара и натаму да се работи на подобрување на бизнис климата, инфраструктурата, како што е железничко поврзаување со Албанија и автопатско поврзување со Косово, работата на администрацијата во одделни институции и користењето на средствата од ИПАРД програмата.
– Ова се предлози кои се контруктивни и добри и кои доаѓаат од искусни бизнисмени и наша задача и обврска е и натаму да помагаме и да настојуваме од се ова што може да се прифати и натаму да ја подобруваме бизнис климата и да има подобри услови за секој бизнисмен без разлика дали е мал или голем – истакна Ставрески.
Стопанствениците од Комората на Северозападна Македонија ја потенцираа добрата соработка со Владата и веруваат дека и натаму таа ќе се подобрува.
– Како бизнис заедница сакаме да бидеме оптимисти и 2014 година сакаме да ја почнеме во оптимистички дух. Оваа наша средба не охрабрува во тој оптимизам. Се надеваме на уште подлабока и почеста соработка со Владата – рече претседателот на Комората на Северозападна Македонија, Мендерес Кучи.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
