Кратово, Радовиш, Ресен и Пробиштип ќе добијат дигитална опрема

По целосната реализација на проектот за обновување на опремата за прикажување филмови во киносалите во 14 центри за култура, на почетокот од 2014 година дигитални кинопроектори ќе добијат и центрите за култура во Кратово, Радовиш, Ресен и во Пробиштип. Оваа одлука за дополнување на проектот што го реализираше Националната установа Филмски фонд е во контекст на заложбата да заживее киномрежата во нашата држава, како и поради големиот интерес на граѓаните за филмската уметност во градовите што добија кинопроектори.

Два пати во изминатиот период беа набавени и монтирани нови дигитални проектори со кои беа опремени центрите за култура во: Кочани, Куманово, Неготино, Струга, Охрид, Кичево, Прилеп, Велес, Тетово, Гостивар, Струмица, Крива Паланка и Дебар.

Реализацијата на овој проект на Министерството за култура имаше многу придобивки во контекст на развивање на филмската култура во Република Македонија и предизвика огромен интерес кај граѓаните кои проследија многу нови светски остварувања, како и домашните филмови кои во изминатиот период беа реализирани преку Филмскиот фонд.

Годинава беа набавени и најквалитетни проектори за двата најголеми фестивали во нашава држава – Фестивалот на филмската камера „Браќа Манаки“ и Фестивалот на европскиот филм „Синедејс“, со што овие еминентни фестивали добија современи услови за проекција на филмови со најнова технологија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.