Македонските ракометни претставници Металург и Вардар денеска и утре ќе играат натпревари од Регионалната СЕХА-лига против Борац Бањалука, односно Татран Прешов, како загревање за многу поважните мечеви во Лигата на шампионите.
Вечерва од 18 часот Металург ќе игра против Борац, а „сините“ од Автокоманда отпатуваа со комбиниран состав. Во Скопје останаа столбовите на играта на македонскиот вицешампион Ренато Вугринец, Павел Атман, Дарко Станиќ, Ванчо Димовски и Наумче Мојсоски и тие нема да играат против некогашниот југословенски ракометен гигант. Шанса ќе добијат талентираните Мартин Манасков, Маџовски, Пешевски, Костески и Талески, играчи што се дел од Академијата на клубот.
Загревањето во Бањалука ќе биде добре дојдено за нив, а и одморот за најискусните, пред следниот голем предизвик во ЛШ и мечот со Барселона на 12 октомври на гости. Тој меч ќе се игра од 16.15 часот.
Вардар утре од 17.45 часот ќе ги одмери силите со Татран Прешов во СРЦ „Кале“, во дуел од четвртата рунда во СЕХА-лигата. Следниот меч на „црвено-црните“ е многу поважен, а епицентарот ќе биде СЦ „Борис Трајковски“ на 13 октомври и пресметката меѓу македонскиот првак и Пари Сен Жермен во Лигата на шампионите.
– Татран Прешов е искусна и квалитетна екипа, играат добар ракомет. Имаат игра која не му одговара на Вардар, тоа лани добро го почувствувавме. Ние што игравме и лани го знаеме тоа, како капитен ќе се обидам и новите играчи што немаат искуство против Татран Прешов да ги упатам во тоа што нѐ очекува во овој дуел. Нѐ очекува тежок противник, тоа мора да го сфатиме максимално сериозно и да се обидеме да победиме и да фатиме добар ритам во овој период – е изјавата на Филип Лазаров.
Тренерот Зоран Кастратовиќ одлучи да го поштеди средниот бек Игор Карачиќ. Хрватскиот интернационалец има повреда на десното рамо и ќе одмори утре. Место него, во составот ќе се врати Илија Абутовиќ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
