Ракометарите на Барселона пристигнаа во Скопје, предводени од мега-ѕвездите Кирил Лазаров, Никола Карабатиќ, Арпад Штербик, Рутенка, Томас, Нодесбо…. Скап тим со богата традиција и многу трофеи во витрините. Ги имаат 8 од Лигата на шампионите, а и годинава се во топ-фаворитите за освојување на вредниот пехар. Буџетот од 6 милиони евра потврдува за каква екипа се работи, една од најдобрите на планетата, со тазе освоен трофеј во „Супер Глоуб“ натпреварувањето.
Премиерата во новото издание на елитното европско натпреварување ќе ја имаат утре од 18,15 часот пред скопјани, во натпреварот против македонскиот првак Вардар.
Капитенот на нашата репрезентација Кирил Лазаров, овојпат ќе биде на спротивната страна и ќе ја предводи Барса во обидот да се освојат првите бодови во ЛШ. Како и секогаш одвои време за новинарите и трпеливо одговараше на прашањата на седмата сила.
„Ова е прв натпревар во Лигата на шампионите за мене во дресот на Барселона. Почнувам со меч во Скопје и тоа претставува големо задоволство за мене. Вардар има респектабилен тим, има ногу добри индивидуалци. Не знам колку имаа време да се воиграат. Респект за Вардар, а нам ни е јасно дека ќе имаме тешка задача. Не бегаме од фаворитската улога, но ќе мора да дадеме максимум за да ја оствариме целта. Ние сме меѓу фаворитите, а сепак е премногу рано да се калкулира со тоа кој ќе ја освои Лигата на шампионите. Многу врева се крена околу дуелот со брат ми Филип. Тој е капитен на Вардар и ќе биде интересно. Секако нашиот дуел ќе биде позитивна работа за македонската јавност и за нашата репрезентација“, рече Кирил Лазаров.
Барселона на импресивен начин ја почна новата сезона и на двата натпревари во Шпанија постигна дури 85 погодоци, а прими само 41, што ја покажува силата и моќта на овој состав на гигантот од Каталонија.
Пишува: Зоран Поповски
Фото и видео: Игор Ангеловски и Александар Ивановски
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
