УЕФА суспендираше судии за местење натпревари

Европската фудбалска федерација (УЕФА) соопшти дека суспендира двајца ерменски судии, откако тие признале дека учествувале во местење натпревар во квалификациите за Лига Европа.

Андраник Арсенјан, кој ја имал улогата на главен судија и неговиот помошник Ховханес Авагјан му признале на Фудбалскиот сојуз на Ерменија дека се обиделе да го наместат реванш натпреварот од првото квалификациско коло меѓу Интер Турку (Финска) и Викинг (Фарски Острови) одигран на 11 јуни годинава.

Во дуелот победил тимот на Викинг со 1:0 и со вкупен резултат 2:1 обезбеди пласман во следната рунда.

Индикациите дека има сомнителни случувања ги потврдил и „системот на УЕФА за контрола на обложувањата“ преку кој се следат над 32.000 натпревари ширум Европа, кој пак регистрирал сомнителни уплати за овој натпревар. Тоа дополнително ги поттикнало сомнежите на УЕФА, од каде решија да спроведат и дополнителна истрага.

Случајот на суспендираните судии ќе го разгледува Дисциплинската комисија при УЕФА на 22 август.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.