Некогашното чудо од дете на хрватскиот ракомет, Никола Кеџо, потпиша 2-годишен договор со Металург и ќе му биде замена на Ренато Вугринец на позицијата десен бек.
Кеџо има 25 години и е висок 204 сантиметри, а доаѓа од унгарското првенство. На 17-годишна возраст, талентираниот десен бек потпиша 6-годишен договор со шпанскиот клуб Сиудад Реал, во тој период веројатно и најсилната екипа на светот.
Хрватскиот ракометар има играно за неколку шпански екипи, настапуваше и во Германија, а оттаму се врати во хрватското првенство и две сезони играше за Нексе. Последен клуб пред да го засили Металург му е унгарскиот Чургу.
„Иако имав уште една година од договорот со Чургу, по повикот на тренерот Лино Червар без секунда двоумење прифатив да играм за Металург, клуб со големо име и светла иднина во ракометна Европа. Сметам дека ова ќе биде голем импулс за мојата кариера и ќе дадам сѐ од себе за да помогнам во остварувањето на зацртаните цели на клубот. Металург гради млада екипа под раководство на докажан стручњак каков што е Червар. Се радувам што ќе бидам дел од неговиот тим, а особено сум среќен што ќе престојувам во еден преубав град каков што е Скопје“, изјави Кеџо за веб-сајтот на РК Металург.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
