Промоција на првата „Македонска рок-енциклопедија“ во Кавадарци

Денеска со почеток од 20 часот во Галеријата при Домот на културата „Иван Мазов – Климе“ Кавадарци ќе се одржи промоција на првата „Македонска рок-енциклопедија“ од авторот Тошо Филиповски.

Извонредната можност рокерите и љубителите на македонската рок-музика од Кавадарци и Тиквешијата, од прва рака да се запознаат со ова оригинално енциклопедиско издание е резултат на долгогодишна работа на авторот. Инаку, Тошо Филиповски е долгогодишен музички новинар и водител на култни музички програми, со особен осврт на македонската рок-музика. Организатор на рок-концерти и фестивали и редок и извонреден хроничар на македонската рок-музика.

Кавадаречките љубители на рок-музиката особено ќе бидат заинтересирани за кавадаречкиот дел од рок-енциклопедијата, кој секако го има во доволна мера и на радост на музичарите.

Содржински промоцијата на првата „Македонска рок-енциклопедија“, освен приказните на Тошо Филиповски, ќе донесе меѓу другото и мал осврт на познавачите на кавадаречките рок-услови, потоа специјално подготвена свирка на двајца извонредни рок-гитаристи Ристе Димитров (Smoke Shakers/Bad-Ass-All) и Виктор Кимов (Leksikon), како и документарец за македонската рок-музика од шеесеттите и седумдесеттите години од минатиот век, во авторство на Аљпша Симјановски.

Авторот на првата „Македонска рок-енциклопедија“, Тошо Филиповски, ќе се задржи во разговор со присутната публика и секако во потпишување на примероците на енциклопедијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.