Издавачката куќа „Антолог“ од Скопје ја најавува промоцијата на книгата „Ораторската вештина низ историјата“ од првиот новинар во Република Македонија – д-р Боро Мокров. Промоцијата ќе се одржи на 13 декември 2017 година, со почеток во 20 часот, во Галеријата при МКЦ. Промотор на книгата ќе биде д-р Ѓорѓи Спасов.
Во 2017 година се одбележуваат сто години од раѓањето на д-р Боро Мокров. Токму затоа, природно се јавува потребата од појавувањето на една негова книга, која е напишана само четири години пред смртта на авторот. Придонесот на д-р Мокров во новинарството со голем број статии и книги од областа на новинарството и на ораторството е видлив и денес.
Издавањето на оваа книга е од големо значење бидејќи живееме во време на масовна употреба на интернетот и на компјутеризацијата, во време во кое комуникацијата на луѓето е сведена на минимум. На тој начин, ораторството е суштината на квалитетна комуникација, начин што има цел да информира, да влијае или да ги забавува слушателите. Ораторството денес, во ова бурно политичко време, излегува во прв план и е потребно во секоја област од нашиот општествен живот. Трудот претставува едно скромно помагало во целокупниот општествен живот, а особено во областа на правото, политиката, економијата, маркетингот итн. Ораторството претставува корен на дисциплините од иднината и неговата суштина ги има истите цели, како известувањето, информирањето, комуницирањето.
Првиот дел од книгата ја содржи историјата на ораторството: ораторските вештини во Грција и во Римската Империја, со примери од Цицерон и од други римски оратори, па продолжува со влијанието на христијанството врз ораторската вештина, односно усното проповедништво, проповедите на апостолите, ораторската вештина на „светите отци“, корените и развојот на македонското беседништво, со примери од текстови од теоријата на реториката. Вториот дел од книгата е составен од преведени дела од оригинален јазик.
Книгата е објавена со поддршка на Министерството за култура на Република Македонија.
Боро Мокров (Велес, 13.12.1917 – Скопје, 30.4.2005) е правник, публицист и прв доктор по новинарство во Македонија. Активист на СКОЈ и член на КПЈ од 1939 година. Поради пројавените активности во КП и во СКОЈ, бил испратен во логорот Меѓуречје – Ивањица, Србија. По окупацијата работел на формирање ќелии на КП во Азот, Велешко, и во подготовките на партизанска база. Во 1942 година бил секретар на СКОЈ, од декември 1942 до крајот на 1943 година бил во затвор, а потоа во интернација. По враќањето од интернација во 1944 година, станал политички комесар на одредот „Трајче Петкановски“ и на Осмата велешка бригада. Се занимавал со историјата на печатот и на новинарството во Македонија. Автор е на повеќе статии и монографии како: „Развојот на македонскиот печат и новинарство“, „Збор, печат, време“, „Весникот Македонија на Коста С. Шахов“ и многу други.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
