Завршни зборови: Артан Груби преговарал со терористите од Диво Насеље додека траеле најжестоките престрелки

Доживотни казни затвор за обвинетите во случајот „Диво насеље“ побара денеска Обвинителството за гонење организиран криминал и корупција кое ги даде своите завршни зборови на судењето за кумановските настани.

Обвинителот Наум Пановски истакна дека бара највисоки кази за обвинетите за настаните во кумановско, објаснувајќи кој од групата осомничена за тероризам каква задача имал во Куманово. Пановски во завршните зборови посочи дека пратеникот Артан Груби комуницирал со терористите од Диво Насеље, и преговарал тие да се предадат. Според доказите од ПИ-мерките, односно од прислушуваните телефони на терористите, се открива дека Груби и еден од обвинетите терористи неколку пати се слушнале по телефон на 9 мај 2015 година. Освен со Груби, за мирно предавање со терористите, преговарале и претставници на ОБСЕ, соопшти обвинителот.

Според доказите обезбдени со ПИ-мерките, обвинетиот Мухамед Красниќи – Командант Малишева кажал дека групата ќе се предаде, но само ако дојде ОБСЕ.

Командата да се фрли зоља на специјалците во 5 часот и 10 минути на 9 мај 2015 ја дал телефонски Мирсад Надрецај – НАТО, рече обвинителот. Во овој прв напад на терористите загинаа двајца специјалци, а неколку беа повредени.

Со ПИ-мерките обвинителството обезбедило докази дека дел од обвинетите организирале илегалното влегување на терористите од Косово во Македонија, а дел од локалното население доброволно ги згрижило во сопствените куќи.

Обвинителството товари 37 лица на кои им се суди за тероризам и терористичка организација. Во нападот во Куманово на 9 и 10 мај пред 2 години, загинаа 8 специјалци, а 42 беа повредени.Ликвидирани беа 10 терористи.

Обвинителот во завршниот збор наведе дека неколку дена пред трерористичките напади во Диво Насеље, обвинетите групирани во две групи илегално ја поминале границата на Република Македонија и со комбе биле префрлени во Куманово, а оружјето го криеле во шума и потоа го транспортирале по куќите на дел од обвинетите. Со ова обвинетите, според обвинителството, ги сториле кривичните дела тероризам и теористичка организација.

На 8 мај, според завршните зборови на обвинителот Паноски, постои телефонски разговор според кој обвинетиот командант – Малишева зборува со непознато лице од затвор за подготовките за нападот. Обвинителите посочија дека преку телефонската комуникација оделе комплетно подготовките, групирањата, а се разменувале информации и за движењето на полицијата. Се договарале да пречекаатт и нова терористичка група. Според обвинителството координатите кои им биле давани од лицата со кои зборувале обвинетите и кои обвинителството ги има со кодни имиња, биле за да се здружат, да бидат во што поголем број и кон терористичката група да се вклучат и други.

Судскиот процес за случајот Диво Насеље почна во февруари, 2016 кога во обвинителниот акт беа имињата на 29 обвинети. Кон ова обвинение потоа беа додадени уште 8 обвинети и во моментов на 37 обвинети им се суди за тероризам и терористичка организација.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.