Ансамблот на Народниот театар-Битола синоќа во театарот „Вера Комисаржевскаја“ во Санкт Петербург, со огромен успех пред тамошната публика го изведе музичко-сценскиот перформанс „Шекспир засекогаш“. Копродукцискиот перформанс, кој е прво меѓународно гостување на оваа национална установа во 2017 година, беше во изведба на актери од Битолскиот театар и од рускиот театар-домаќин „Вера Комисаржевскаја“. Перформансот беше изведен во форма на маратонска актерска манифестација посветена на Шекспир.
Освен во музичко-сценскиот дел, битолската група „Фолтин“ која настапува во перформансот, приреди и посебен концерт за руската публика. Во претставата настапија актери од Македонија и Русија, но како почесен гостин настапи и народниот актер, некои го нарекуваат и актерска икона во Русија, Ивак Краско, кој иако има 89 години, се уште е активен. Заедно со актерите од Русија настапија и битолските актери Соња Михајлова, Катерина Аневска, Никола Пројчевски, Александар Димовски и други членови на ансамблот. Народниот театар-Битола оваа пролет, со поддршка на Министерството за култура, ќе настапи и во Канада.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
