Втората по големина швајцарска банка, „Креди Свис“ соопшти дека во текот на оваа година ќе отпушти околу 6.500 вработени, откако лани оствари загуба од 2,44 милијарди франци.
Извршниот директор на банката, Тидјан Тиам, кој го презеде раководењето со оваа финансиска групација пред нешто повеќе од 18 месеци, соопшти дека во следниот период „Креди Свис“ ќе се ориентира кон управување со имоти, отстапувајќи од инвестициското банкарство.
„Креди Свис“ во текот на 2016 година веќе укина 7.250 работни места, како дел од мерките за намалување на трошоците.
– Сега си поставивме цел за 2017 година да укинеме меѓу 5.500 и 6.500 работни места, изјави финансискиот директор на „Креди Свис“, Давид Метерс.
Во најавата на „Креди Свис“ не се посочува од кои сектори ќе бидат отпуштени вработените, но се додава дека со отпуштањето ќе бидат опфатени службеници, консултанти и помошен персонал.
„Креди Свис“ претходно најави дека би можела да продаде 20 до 30 проценти од своите филијали во Швајцарија, но и дека е отворена за алтернативни опции за сопственото зајакнување.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
