Објавувањето на последната анкета на Институтот „Павел Шатев“ го вклучи алармот во СДСМ и меѓу поддржувачите на политиката на Зоран Заев.
Според неофицијалните информации до кои дојде „Република“, за наредниве четири дена се подготвува почнување нови истраги, доставување обвинителни предлози, а не е исклучено да се оди и со обвиненија, само за да се дефокусира вниманието на јавноста од срамното пазарење на СДСМ со националните интереси.
Откако раководството на СДСМ увиде дека повеќе од 90 проценти од анкетираните се спротиставуваат на идеите за воведување двојазичност и редефинирање на Македонија преку надминување на рамките на Охридскиот договор, Заев во предизборната арена ја вметнува и Катица Јанева, која како резервен играч треба да ги одработи последните минути и да ја намали на минимум штетата направена со протекувањето на неговите настапи во Швајцарија, пред албанската дијаспора.
Меѓу добро упатени кругови од СДСМ веќе кружат информациите, односно нивните желби дека Катица Јанева треба што поскоро да излезе со пријава во врска со набавка на ВИП-возило во Министерството за внатрешни работи, во врска со изградбата на автопатот Демир Капија – Смоквица или, пак, со некаков акт насочен кон судската власт, која би требало да биде заплашена во пресрет на гласањето в недела.
Ваквите засега неофицијални информации, правни експерти за „Република“ само кусо ги прокоментираа како уште една потврда во прилог на тезите за партизираноста, необјективноста и непрофесионалноста на СЈО.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
