Гинекологот ќе одговара за смртта на родилката од Прилеп

По спроведените дејствија од страна на надлежен јавен обвинител, Основното јавно обвинителство – Прилеп до Основниот суд – Прилеп поднесе обвинителен предлог против Г.О., лекар специјалист гинеколог- акушерство Општа болница „Борка Талески” Прилеп, соопшти денеска Јавното обвинителство.

На обвинетиот му се става на товар дека сторил кривично дело – тешки дела против здравјето на луѓето .

На ден 18.02.2016 година, во просториите на болницата, осомничениот при укажување на лекарска помош – породување на сега починатата С.Б. од с. Беровци – Прилеп, несовесно постапувал. При приемот во одделението, осомничениот не презел соодветни дејствија и навремено не интервенирал при породувањето и во периодот по породувањето. Како резултат на ненавремено преземање на соодветни дејствија здравствената состојба кај сега починатата нагло почнала да се влошува заради големото губење на крв, па осомничениот решил да преземе оперативен зафат кој бил безуспешен и не можело да се спречи понатамошното крварење.

И покрај сите преземени дејствија од страна на лекарите анестезиолози во рамки и во согласност со протоколите и објективната здравствена состојба, пациентката починала како резултат на хеморагичен шок настанат заради обилното крварење.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.