Кој е виновен за сообраќајката на Партизанска? Повредени три лица

Три лица се полесно повредени во сообраќајната несреќа, која вчера вечерта се случи на булеварот „Партизански одреди“ во близина на бензиската „Окта“.

Од полицијата денес информираат дека во несреќата учествувале автомобил „јагуар“ управуван од Б.М. (21) од скопско Сарај, „ауди А3“ управувано од 39-годишната В.С. од Скопје и „ауди А1“ кое го возела 37-годишната скопјанка З.К.

Повредени се возачите на „јагуарот“ и на „аудито А3“, како и сопатничката А.А. од овој автомобил, кои со возило на Итна медицинска помош се пренесени во ГОБ „8 Септември“ каде што по укажаната лекарска помош се пуштени на домашно лекување.

Неофицијално причина за несреќата е неприспособена брзина на движење. Очевидци во несреќата вчера за „Република“ кажаа дека учествувал уште еден автомобил „јагуар“, кој избегал.

По дадените изјави на присутните автомобилот и лицето што го управувало се пронајдени од полициските екипи и вратени на местото на несреќата. За оваа информација сè уште нема потврда од полицијата. Очевидци на несреќата велат дека не е исклучена можноста возачите на двата автомобили „јагуар“ да се натпреварувале.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.