Што сè се смени во фудбалот меѓу двата порази на Арсенал во ФА купот

Престижниот спортски портал за статистика Squawka изнесе неколку интересни податоци.

До вчерашниот пораз од Вотфорд и елиминацијата од ФА купот, „топчиите“ немаа загубено натпревар во ова натпреварување повеќе од три години. Поточно, од февруари 2013 година кога загубија од Блекбурн.

За тие три години Арсенал победи во 16 последователни натпревари во ФА купот, го освои два пати, вкупно 12 во историјата на клубот и со тоа стана рекордер по бројот на титули во ФА купот, а во светот на фудбалот се случи многу, се сменија некои работи.

Еве неколку интересни податоци од тој период, последните три години:

1. Манчестер Јунајтед промени четворица тренери (менаџери)!

По заминувањето на Сер Алекс Фергунсон тимот прво го превзема Дејвид Мојс, но не остана ниту една цела сезона, па до крајот кормилото привремено го превзема играчката легенда на „црвените ѓаволи“, Рајан Гигс. По завршувањето на Мундијалот во Бразил, Луис Ван Гал стапи на сцена.

2. Квинс Парк Ренџерс два пати испаѓаше од Премиер Лигата!

Првиот пат под водство на Марк Хјуз (2013 година), а потоа и кога Сер Хари Реднап беше тренер (2015 год.).

3. Жозе Мурињо се врати во Челси…

…ја освои титулата во својата сјајна, втора сезона, а потоа повторно беше избркан од „Стемфорд Бриџ“.

4. Малерозниот „топчија“ Џек Вилшер…

…имаше само 32 настапи во Премиер Лигата како стартер.

5. Лестер дебитираше во Премиер Лигата со освојувањето на Чемпионшип лигата во сезоната 2013/14,…

…на магичен начин под водство на Најџел Пирсон во својата прва сезона избори опстанок во елитата, а веќе во следната со Клаудио Раниери е лидер на десет кола пред крајот на сезоната и најсериозен кандидат за титулата.

6. Арсеналовиот „архитект“ Месут Озил…

…забележа 32 асистенции во Премиер Лигата.

7. Лео Меси постигна 147 голови во сите натпреварувања…

…и освои 7 трофеи!

8. Тимот на ПСЖ загуби само еден натпревар на свој терен во домашната лига…

…и освојуваше четири последователни титули шампион на Франција.

9. Поранешниот гигант во англискиот фудбал и некогашен полуфиналист во Лигата на Шампиони, Лидс Јунајтед, промени дури осум тренери.

Најкратко на кормилото се задржа поранешниот репрезентативец на СФРЈ и Словенија и поранешен фудбалер на Партизан, Дарко Миланич – само 32 денови. Нил Редфрам имал дури три тренерски мандати во овој период.

10. Во фудбалот е воведена технологијата за гол-линија, како и…

… употребата на спреј за обележување на местото на прекин на играта и границата за „жив ѕид“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.