Институтот „Конфуциј“ при Универзитетот „Св. Кирил и Методиј“ вечер во ресторанот „Пелистер“ во Скопје организира одбележување на традиционалниот Празник на фенерите, кој се слави на 15-тиот ден од почетокот на Новата година според кинескиот лунарен календар.
– Празникот на фенерите традиционално се чествува во Кина и со него се одбележува почетокот на пролетта и завршувањето на двонеделното празнување на кинеската Нова година, исто така познато како Празник на пролетта. На овој ден, кога Месечината е полна првпат во Новата година, во вечерните часови илјадници хартиени фенери се пуштаат да летаат кон небото, се палат огномети и петарди и се јадат слатки оризови топчиња кои се викаат танг јуен или јуен шијао, во парковите се организираат танцови со фенери и други танци и игри. Овој традиционален семеен празник се слави во континуитет веќе 2000 години, информира Институтот „Конфуциј“.
По повод празникот, ресторанот „Пелистер“ во соработка со кинескиот ресторан „Ѕвезден океан“ во Скопје, вечер ќе понуди посебно мени со кинески специјалитети за гостите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
