Американскиот весник „Вашингтон пост“ на своите страници посветени на туризмот пренесува подолга репортажа за велосипедска тура низ Македонија, од репортерката Дајан Даниел. Текстот ги претставува природните и гастрономски убавини на Македонија, со посети на Крушево, Битола, Преспа, Охрид и Скопје.

Репортажата ја претставува Македонија како земја на љубезни луѓе, каде може да се видат диви рисови и пеликани, да се истражуваат древни археолошки наоѓалишта и да се ужива во извонредна храна. Авторката особено е одушевена од ајварот и од шопската салата. Авторката во детали ја опишува својата потрага по домашно подготвен ајвар во преспанското село Љубојно.

-Првите два дена, со велосипедите минувавме покрај куќи украсени со редици исушени пиперки, како низи црвени обетки. Се обидувавме да видиме (намирисаме) каде се подготвува ајвар и бевме одушевени кога најдовме една куќа. Иако немам обичај да јадам специјалитети со лук со моето утринско кафе, но не можев да престанам да шлапам дебели слоеви ајвар на парчиња леб – пишува Даниел во репортажата.

Велосипедската тура поминува низ археолошкото наоѓалиште Хераклеја Линкестис, во близината на Битола, за кое Вашингтон Пост пишува дека иако само мал дел од урнатините е истражен и нема доволно информации за посетителите, сепак може да се посетат темелите на римскиот амфитеатар, базиликата и два импресивни мозаици.

Репортажата изнесува и забелешки за туристичката понуда на Македонија, пред сè за отпадот расфрлан низ земјата, вклучително и во националниот парк Пелистер, како и за опасниот стил на возење.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.