Со првиот собир на дел од репрезентативците на Македонија, започнаа подготовките за Европското ракометно првенство во Полска 2016 година.
Очекувано како и досега поради клупски обврски од првите тренинзи на селекцијата изостануваат дел од интернационалците, но секако помошниот тренер Данило Брестовац ќе ги започне тренинзите по агендата која одпаред е договорена со селекторот Ивица Обрван. Хрватот најави отсуство поради семејни причини и ќе се приклучи на таборот по новогодишните празници.
Пред нова година ќе се приклучат и првотимците, Кире Лазаров, Филип Миркуловски, Борко Ристовски и Ацо Јоноски кои имаат обврски кон своите клубови се до 29.декември.
Во репрезентацијата се враќа и столбот во одбраната Велко Маркоски кој најде ангажман и веќе е влезен во тренажен процес и натпревари со ППД Загреб.
Стојанче Стоилов кој успешно закрепна од тешката повреда на рамото, се очекува да биде еден од носителите на играта на македонската репрезентација и посакува да се искористи шансата на оваа генерација и да се стигне до следната рунда на ЕП и секако во квалификациите за ОИ во Рио 2016 година.
– Се надевам дека ќе научиме од грешките од минатото. Веќе долго време сите кажуваме дека ова е последна шанса на оваа генерација, сега мислам дека ова е навистина последна, мислам на првенството и квалификациите за Олимписки игри доколку се пласираме. Секоја година сме постари и веќе знам многу од ракометарите кои зборуваат за пензионирање. Нема да зборувам во ничие име, но ова е таа последна шанса. Мислам дека сме зрели да го повториме успехот од Србија, па и повеќе од тоа – вели Столе Стоилов.
Токму српската репрезентација ќе биде нашиот централен фокус во Краков во групната фаза. Што ќе направиме претходно со фаворитите Франција и Полска ќе биде плус.
– За групата некои велат дека е тешка, некои лесна, а јас мислам дека можеме да играме против сите. Сепак, нашето финале е мечот со Србија, кој ќе биде клучен за пласманот понатаму. Што и да се случи претходно мора да ги победиме Србите. Мислам дека оваа генерација може да види Олимписки игри и се надевам дека нема да разочараме – додаде Стоилов.
Репрезентацијата ќе тренира во „Јане Сандански“ двапати дневно, а на трети јануари заминува за Словенија, каде што ќе одигра два контролни меча со тамошната репрезентација (4 и 5 јануари). По еднодневната пауза за божиќните празници следува нова проверка, против Црна Гора на 10 и 11 јануари. Во меѓувреме репрезентацијата треба да се пополни во целост.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
