Македонски економски самит во организација на Македонија 2025 ќе се одржи во Скопје од 18 до 20 ноември.
Самитот претставува собир на експерти кои ќе дадат свое мислење на теми како достигнување технолошки развој и иновации, нивна комерцијализција и како Македонија може да стане технолошки понапредна.
Меѓу говорниците се Виктор Груев, професор и истражувач на универзитетот Вашингтон, кој развива сензорски технологии со примена во здравствениот сектор, Филип Нордфелт основач на компанија што се занимава со процесирање на цели терабајти од информации што има огромна примена во таканаречениот Big Data сектор, Филип Мисовски заменик-претседател и главен експерт за продукти на германската компанија САП, кој ќе зборува како Македонија може да се претвори во иновациски и инфо-комуникациски центар.
На самитот ќе има и тематски дискусии со светски успешни претприемачи каде модератор ќе биде Крис Павловски, основач на Rumble, а меѓу оние кои ќе одговаат на прашањата како успеале да ја воздигнат вредноста на нивната компанија до седумцифрена сума се: Скот ДеЛонг, интернет претприемач и основач на портал што годинава се продаде за 100 милиони долари, Џон И. Битов, претприемач, филантроп и човекот кој го донесе НБА тимот Репторс во Торонто, како и преставник од Google.
– Ова е експертски настан на кој акцентот е ставен на трансфер на знаењето, инспирирање на младите и приказ на она што го прави светот од технолошки аспект со цел Македонија да може поскоро да се приклучи кон тие светски текови, изјави Зоран Мартиновски, претседавач со Самитот.
Соосновачот на Македонија 2025, Мајк Зафировски, кој исто така ќе биде почесен говорник на Самитот вели дека самитот е фокусиран на промена на начинот на кој се размислува за бизнисот и лидерството и ги вклучува можностите за поширока соработка меѓу регионалните компании и поединци за се обележи балканскиот регион на мапата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
