Плодови со карактеристичен вкус и со многу витамини

По сеидбата, температурата треба да се одржува од 23 до 25 Целзиусови степени, а ноќната температура треба да се движи од 16 до 18 степени. За нормален развој потребно е температурата на почвата да биде од 20 до 22 степена. Модриот патлиџан се произведува исклучително со расад. Начинот на производство на расадот е многу сличен со производството на расад од пиперка, а се расадува кога добро ќе се формираат котиледоните или првите листови.

Садењето на расадот на пос­то­јано место се прави кога ќе поминат 50-60 дена и се сади на растојание од 60 до 70 сантиметри на 40 до 50 сантиметри, што зависи од бујноста и од сортата на модриот патлиџан. Многу тешко се вкоренува и затоа првото окопување е по 20-30 дена. Во текот на вегетацијата се окопува два до три пати. До приодот на формирање на плодовите почесто се наводнува, а во фаза на растење и на зреење на плодот наводнувањето мора да биде на секои пет до седум дена со поголемо количество вода.

Модриот патлиџан во Македо­нија се одгледува на мали површини за потребите на преработувачката индустрија и на домаќинствата. Потекнува од Индија, се одгледува во цел свет на површина од околу два милиона хектари, додека најголем производител на модар патлиџан е Кина, но се одгледува и во Индија, Египет, Турција, Њу Џерси (САД), а се смета дека во Европа го донеле Арапите меѓу 6 и 7 век.

Плодот по форма може да би­де топчест, јајцевиден или како круша, а тежината му е од половина килограм до еден килограм. Модриот патлиџан е нискокалоричен, односно содржи 30 калории, минералите калциум, натриум и калиум, вода 92,7 отсто, протеини 1,1 отсто, јаглехидрати 5,7 отсто, мали количества витамин Ц, витамин Б, траги од сапонин и други алкалоиди.

Модриот патлиџан изобилува со антиоксидансите антоцијан, насунинон и флавонин. Во кулинарството најмногу се цени неговиот карактеристичен вкус и со него може да се приготват многубројни карактеристични јадења.

Плодот се бере во технолошка зрелост, кога по боја е виолетов, со сјајна лушпа и е многу цврст. Старите плодови, кои се меки, овенати и со темна боја, не се за употреба бидејќи содржат големо количество од алкалоидот соланин, кој предизвикува проблеми со варењето на храната, а со варењето на патлиџанот на повисока температура, количеството на соланинот се намалува дури за 50 отсто. Модриот патлиџан дејствува антиалергиски, се консумира против воспаленија и содржи антиканцерогени материи, а антиоксидансите, пак, ги чуваат клетките од оштетување и пропаѓање.

Бербата на модриот патлиџан, без оглед на местото на производство, почнува за 60 до 70 дена. Приносот се движи од 50 до 80 т/ха што зависи од сортата и од должината на вегетацијата и на развивањето и зреењето на плодот. Плодовите се чуваат на собна температура од пет до седум дена, а на температура до пет Целзиусови степени издржуваат и неколку недели.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.