Денеска од 17 часот, во Минск, македонскиот ракометен првак Металург, го почнува осминафиналниот двомеч со белоруски Динамо, во Лигата на шампионите. Предизвикот е голем, а историјата на дофат, за прв пробив на наша екипа во октетот најдобри, во најсилното европско клупско натпреварување.
Цврстата одбрана е главен адут на Мателург, против незгодниот претставник од Источна Европа. Динамо е силна екипа составена од руски и белоруски репрезентативци, а се издвојуваат Атман, Онуфриенко и Бабичев. Квалитетот го презентираа и против најсилните тимови во Европа, па во фазата по групи ги победија реномираните Фуксе Берлин, Пик Сегед, Загреб, а едвај ги порази Барселона. Во двата меча со европскиот гигант загубија со мала разлика од еден гол во Каталонија и два во Минск.
Динамо има добри спомени во дуелите со Металург. Во квалификациите во Порто пред две сезони, го елиминираа македонскиот тим со победа од 27-21. Отогаш, сепак има доста промени во двата состави. Металург се промовира во силна европска екипа, а се реваншираше во Струга на традиционалниот турнир, со триумф против Динамо од 26-23.
Денеска во Минск, е само првото поглавје од осминафиналната пресметка, а конечниот победник ќе се знае по реваншот во Скопје, на 23. март.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
