Најдобриот исландски ракометар, Валур Сигурдсон, смета дека неговата репрезентација нема да има лесна задача во пресметката со македонскиот национален тим. Во ситуација откако веќе загубија со Русија, на Исланѓаните им е јасно дека немаат друг избор освен да слават над Македонија доколку сакаат да го избегнат четвртото место во групата, а со самото тоа и пресметката со Франција во осминафиналето.
-Овој меч е можеби најважниот за нас на овој шампионат, бидејќи не смееме да си дозволиме нов пораз. Секој сака да ја избегне Франција, а ние не сме исклучок, затоа ќе мораме да славиме над Македонија. Нормално дека нема да биде лесно, имаме против себе многу тежок ривал предводен од Кире Лазаров, кој е еден од најдобрите ракометари во светот. Според мене, шансите се 50-50, а она што е јасно е дека ќе мораме да дадеме 100% од своите можности ако сакаме да се надеваме на триумф. Ќе мораме да инсистираме да ја наметнеме сопствената игра, можеби е клише, но најсилни сме кога голманот добро брани, одбраната функционира одлично и создаваме ситуации од лесни голови од контра и полуконтра. Тоа е рецептот за успех и против Македонија, што ќе се обидеме да го спроведеме во дело на утрешниот меч – изјави за ЕКИПА крилниот ракометар на Кил, кој што успешно се снаоѓа во улогата на лидер на исландскиот национален тим.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
