Институт за јавно здравје: Седумина заразени со бактеријата листерија, тројца починале, меѓу нив и новороденче

За еден месец починале тројца заразени со бактеријата листерија, која е пронајдена седумина пациенти во Македонија. Комисијата за заразни болести во присуство на министерот за здравство, Никола Тодоров, денеска доцна попладне одржа состанок, кој е трет по ред во изминатите четири дена, по добиените информации од Институтот за јавно здравје дека за еден месец е регистрирана појава на седум случаи кај кои лабораториски е потврдено присуство на бактеријата листерија, објави „Канал 5“.

Пет од пријавените случаи се со дијагноза листериозен менингитис или менинго енцефалитис, а две новородени деца се со дијагноза листериозна сепса. Од пријавените седум случаи, три завршиле со смртен исход, од кои еден на возраст од 72 години, вториот случај на 59 години и едно новородено дете.
Листериозата е бактериско заболување, кое најчесто настанува по внесување на храна контаминирана со бактеријата листерија, како што е месо, преработки од месо, непастеризирано млеко и млечни производи, недоволно измиено овошје и зеленчук, димена риба и друго. Кај здрави лица со подобар имунитет, заболувањето поминува со полесна клиничка слика.
Листеријата се уништува со добра термичка обработка, со печена и варена храна (над 70 степени целзиусови).
Најчесто се регистрира меѓу постари лица со намален имунитет, бремени жени и новородени деца. Кај нив може да предизвика сериозни компликации, како сепса, воспаление на мозочни обвивки (менинго енцефалит), воспаление на срцева обвивка (перикардит), воспаление на зглобови и сл.
Според податоци од ИЈЗ, во текот на 2013 година бактеријата е изолирана кај 3 мостри од храна, но нема пријавено заболени лица. Во 2014 година (до јуни) уште во три мостри од храна е изолирана оваа бактерија, при што само во последниот месец се пријавени 7 случаи на лица заболени со листериоза.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.