Мерката за отпис на долговите на најранливите категории граѓани, социјалците, невработените по двајца каде што се во семејство или еден невработен самец или оние кои имале тешка состојба во семејството е реална и потребна за најсиромашните категории граѓани, изјави вицепремиерот и министер за финансии и носител на листата на ВМРО-ДПМНЕ во изборната единица 4, Зоран Ставрески.
Според него, нема причина СДСМ да биде против таа мерка и да биде против народот и граѓаните бидејќи, како што изјави Ставрески, тие заслужуваат поддршка, заслужуваат да им бидат отпишани долговите.
– Ние преку ослободување од даноци на приватните фирми ќе го постигнеме тоа и на граѓаните кои спаѓаат во овие категории до крајот на септември целосно ќе им бидат отпишани обврските така како што ВМРО-ДПМНЕ ветува во програмата – рече Ставрески во струмичко Ново Село.
Тој додаде дека проектот не би бил во програмата доколку не се сигурни дека може да се реализира и оти е во корист на граѓаните.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
