Издавачката куќа „Магор“ вечерва со почеток во 20 часот организира промоција на збирката раскази „Тајна мисија“ од Влада Урошевиќ. Промотори на изданието ќе бидат проф. д-р Ангелина Бановиќ-Марковска и Владимир Јанковски. Одломки од расказите ќе чита самиот автор.
-Збирката раскази „Тајна мисија“ е составена од дваесет и еден расказ, кои на најдобар можен начин ја покажуваат умешноста на авторот во формата што можеби најмногу му одговара: расказот. Станува збор за текстови во кои тој го продолжува својот интерес за фантастиката, за необичното и чудесното во литературата.Расказите на Урошевиќ постојано и систематски создаваат еден свет, еден можен свет што постојано ќе го надополнува постојниот свет, збогатувајќи го и додавајќи му нова смисла. Тие произлегуваат од идејата дека мисијата на писателот е постојано да ги умножува слоевите на светот, на тој начин правејќи го посложен, а со тоа и поинтригантен, вели Владимир Јанковски во својата рецензија.
-Влада Урошевиќ е автор за кого уметноста не смее да ја прифаќа зададеноста на работите. Нејзината мисија е постојано да ги доведува под прашање нештата што се доживуваат како непроменливи. Да се измести веќе поставената рамка и да се претпостави дека често светот не е она што го гледаме – тоа е поетичкото начело што го води без разлика дали станува збор за прозата, поезијата или есеистиката. Во неговите раскази, надворешниот свет досеглив со механизмите на научната мисла и процедурите на егзактните науки е само еден вид амбиент, почетна околност од која се развива и на сцена стапува оној другиот свет, светот на имагинарното, фантастичното, непроверливото но силно интуитивното, насетуваното, подвлекува Јанковски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
