Во грчкиот парламент вчера за малку беше избегнат дипломатски инцидент кога претставникот на Македонија, Хајрула Мисини, ја нарече својата земја Република Македонија и го критикуваше грчкото претседателство со ЕУ дека проширувањето не е меѓу неговите приоритети.
Ова денеска го коментираат речиси сите грчки медиуми, осврнувајќи се на учеството на претседателот на собраниската Комисија за европски прашања, Хајрула Мисини, на конференцијата на претседателите на комисиите за европски прашања на земјите-членки на ЕУ-КОСАК, што се одржа во Атина, во рамките на грчкото претседателство со Европската унија.
„Мисини ја ослови својата земја под нејзиното уставно име“, пишува „То Вима“ додавајќи дека по коментарот на македонскиот претставник, Венизелос се вратил на темата и на дипломатски начин го вратил прашањето во неговите вистински меѓународни димензии.
– Во врска со забелешката на нашиот драг пријател од поранешната Југословенска Република Македонија: ако добро сфатив, тој е од партијата предводена од господинот Ахмети, со кого имав можност да се сретнам во Атина пред неколку месеци. Ќе го повторам тоа што го кажав претходно. Грција нема забелешки, кои се однесуваат на нешто апсурдно или нешто претерано. Ние сакаме да се исполнат општите критериуми и да се постигне договорено решение во врска со името – го пренесуваат грчките медиуми одговорот на Венизелос кој го повторил и ставот за сложено име со општа примена, кое ќе вклучува географска одредница на терминот „Македонија“.
Инаку, претседателот на Комисијата за европски прашања, Хајрула Мисини, на конференцијата праша зошто Грција, како познат промотор на проширувањето, денес, во моменти кога претседава со Европската унија, за жал, го нема проширувањето како свој приоритет.
Тој се повика на петте позитивни препораки од страна на Европската комисија и Европскиот парламент за почеток на преговорите за членство со Европската унија, како аргумент дека сме ги исполниле копенхашките критериуми. Притоа, побара Грција да биде наш гласен поддржувач затоа што тоа ќе ја смени атмосферата во двете земји и ќе придонесе за подобра слика на Грција во Република Македонија, но и во рамките на Европската унија, и секако дека ќе биде историски чекор на Република Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
