Видно уморни по едноиполчасовниот концерт, Стјепан Хаусер и Лука Шулиќ, сепак одвоија малку време да ги испочитуваат новинарите. Но, пред тоа, долгокосиот шармер Стјепан буквално одмори нозе на каучот во холот на прилепската општина.
Двете виолончела експлозивно го отворија 11. по ред „Пивофест“. Дека енергичните рок- песни изведени на класични инструменти им се допаднаа на прилепчани и нивните многубројни гости зборува и фактот што хрватското дуо „Ту челос“ (2cellos) три пати се врати на бис.
Едно е сигурно, не само што им се допадна фестивалот, им се допадна и македонското пиво. Како што самите признаа, сигурно ќе се напијат по уште едно пред спиење.
Иако имаат соработувано со многу вистински ѕвезди, а беа дел и од турнејата на сер Елтон Џон, и светски познатите музичари, како што се Стјепан и Лука, имаат свои неостварени желби за соработка.
– Би можеле со Стинг, тој има баш онака, убав глас. Тој би бил еден глас ние две чела… А не би се бунеле ни Ролинстоунси ако посакаат – вели Стјепан.
По настапот на „Пивофест“, ги очекуваат настапи во Босна и Херцеговина, Германија, Италија, САД. Ова е втор пат да ја посетат Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
