Арифовски: Турново покажа дека не е случајно во Европа

Хоризонт Турново има солиден резултат иако загуби со 1-2 од Хајдук, пред реваншот во Скопје на 25 јули. Клуб од мало место со големо срце, што сака да се претстави во вистинско светло. Тоа беа желбите на комплетната експедиција на турновци пред мечот, а сѐ што посакаа потполно го остварија. Играа со срце, машки и мудро и да ги искористеа шансите, можеа да направат комплетно изненадување. И вака имаат на што да се надеваат иако во реваншот ќе бидат ослабено без најдобриот стрелец Дејан Блажевски и без Митров, играчи што имаат парни жолти картони.

– Имаме активен резултат и со право се надеваме дека можеме да одиме понатаму. Покажавме дека не сме случајно на европската сцена. Хајдук е поквалитетен, но мора тоа да го потврди на терен. Да ни понудеше некој пред мечот ваков резултат, ќе го прифатев, но сега жалам за тоа што го испуштивме и за резултат 1-1. Хајдук има млада и неискусна екипа, а ние немаме доволно искуство во европските натпревари. Сепак, жалиме бидејќи сме поразени и примивме два гола, без да ни направат зрела шанса. Ние се браневме извонредно и одевме на контранапади преку Балдовалиев и Блажевски. Имавме неколку зицери и штета е што не ги искористивме – изјави Шефки Арифовски.

Реваншот е за седум дена во Скопје, а Турново заслужува поддршка од македонските љубители на фудбалот. Како награда за убавата презентација на нашиот фудбал и во Сплит и претходно против литванска Судува. Дебитантот на евросцената доаѓа од селото Турново, кое брои околу илјада жители и е меѓу аутсајдерите во ова натпреварување, но покажа дека е жилав противник, со играчи кои имаат огромно срце.

– Нашата процената  за силата на Турново беше погрешна. Говоревме дека ние сме Хајдук, а тие се тим од село со 900 жители. Се обидував да ја подготвам екипата за да не го потцениме противникот, но приказните од медиумите влијаеа врз нив. И во Скопје ќе одиме на победа – изјави тренерот на Хајдук, Игор Тудор.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.