Невреме во Дубровник, поплавени повеќе куќи и патишта

Силно невреме ноќеска го зафати хрватскиот град Дубровник и околината. По поројните врнежи од дожд, поплавени се улиците во поголемиот дел од градот, а водата навлегла и во неколку станови и куќи.

Пожарникарите за само три часа, од 4 до 7 часот, имале 30 интервенции за испумпување вода од домовите, јавуваат хрватските медиуми. Проблеми има и на магистралните патишта, а надлежните предупредуваат и на одрони.

Освен во Дубровник, времето е нестабилно и во другите делови од Хрватска. Врнежи од дожд има во повеќе градови, а има и силен ветер поради кој се затворени многу патишта.

Во прекин е и морскиот сообраќај на линијата од Новаља – Таб – Риека, како и линијата Мали Лошињ – Црес – Риека и траектната линија Призна – Жигљен.

Метеоролозите за денеска во Хрватска најавија постабилно време и разведрување од попладневните часови.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.