Се бараат 27 директори

Министерството за култура вчера ги објави конкурсите за директори на 27 национални установи во повеќе градови низ Македонија. Се бараат директори на три театри, осум центри за култура, шест музеи, три универзитетски библиотеки, за двата конзерваторски центри во Скопје и во Гостивар, како и за директор на Кинотеката на Македонија, Струшки вечери на поезијата, Охридско лето, Спомен-куќата на Мајка Тереза и за Ансамблот на албански ора и песни.

Конкурсите се однесуваат и на Македонскиот народен театар, Драмски и „Театар Комедија“.

Распишаните конкурси за директори на националните установи – центри за култура се однесуваа на Крива Паланка, Делчево, Дебар, Кичево, Охрид, Велес, Штип и Струга.

Од областа на музејската дејност директорите се бараат во Археолошките музеј, Природонаучниот музеј и музеите во Струмица, Битола, Струга и Штип.

Конкурс за директори се распишани и за универзитетските библиотеки во Скопје, Битола и Штип.

Согласно законот, се води сметка за мандатите на в.д. директорите, и каде што има услови се распишува оглас за редовен мандат, а каде што сè уште не се извршени измените се продолжува мандатот на в.д. директорот.

Кандидатите е потребно да бидат државјани на Македонија и во моментот на избирање со правосилна судска пресуда да не му е изречена казна или прекршочна санкција. Потребно е да го исполнуваат условот за завршено високо образование со најмалку 240 кредити по ЕКТС. Исто така, потребно е да имаат еден од меѓународните признаени сертификати или уверенија за активно познавање на англискиот јазик, не постар од пет години.

Aпликантите треба да докажат дека имаат минимум пет години работен стаж во областа на културата или пет години работно искуство на проекти во областа на културата врз основа на склучени договори на дело.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.