Жерновски нов заменик-министер за надворешни работи

Поранешниот градоначалник на општина Центар, Андреј Жерновски, се очекува да биде новиот заменик министер за надворешни работи. Жерновски беше пратеник девет години во три мандати, се до 2013-та година, кога стана градоначалник, пишува „Либертас“.

На локалните избори минатата година се откажа од повторна кандидатура и премина од ЛДП во СДСМ, изјавувајќи дека ќе стапи на висока позиција во владата, што и се случува со актуелната владина реконструкција.

Неофицијално, заменик – министер ќе стане и пратеникот од СДСМ, Петар Атанасов, кој треба да го заземе местото на Арбр Адеми од ДУИ во Министерството за образование. Атанасов ова го објави утрината на својот ФБ профил.

Се дознава дека урологот Асим Муса од ДУИ ќе биде заменик-министер за здравство. Претходно беше соопштено дека економистот и поранешниот пратеник Бардил Даути од ДПА ќе раководи со Министерството за странски инвестиции, додека Мусадик Беќири од истата партија, ќе биде втор човек во Министерството за транспорт и врски.

Извесно е дека Роберт Алаѓозовски заминува од министерското место во култура, а на негово место седнува кадарот на Беса, Асаф Адеми.

Се очекува и смена на министерката за образование Рената Дескоска која ќе оди во правда, а на функцијата ќе биде поставен нејзиниот досегашен заменик Арбр Адеми.

извор: .libertas.mk

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.