Германските инвеститори за владата на Заев: Влошени услови за бизнис, економската состојба е полоша од лани, најголем проблем е корупцијата

Економската состојба во земјава е полоша отколку лани – ова е мислењето на повеќе од половина од германските компании во земјава според анкетата што ја направи македонско – германското стопанско здружение. Сепак, Германците се оптимисти дека до крајот на годинава деловната клима значително ќе се подобри. И покрај тоа што Германците не сакаа директно да ја коментираат најавата на владата за зголемување на персоналниот данок, потенцираат дека секоја фирма се стреми да ги намали, а не да ги зголеми своите трошоци.

За германските компании, најголем проблем во Македонија е високото ниво на корупција и криминал, работата на јавната администрација, политичката несигурност, а на незадоволително ниво се и правната безбедност и условите за наука и развој. Велат дека се задоволни од стручноста на вработените, но дека им е тешко да го најдат потребниот кадар. Соработката со македонските компании и покрај напредокот е на незадоволително ниво, главно поради тоа што тие ретко ги достигнуваат потребните европски стандарди.

72 отсто од фирмите се изјасниле дека повторно би инвестирале во Македонија иако овој процент е помал од ланските 82 отсто. Во земјава работат над 200 компании со германски капитал што вработуваат 20 илјади луѓе.

Инаку Македонија од почетокот на владеењето на СДСМ секој ден пропаѓа на економски план, бележејќи негативни резулати на секое поле.

Долгот на државата е зголемен

Долгот на Република Македонија оваа година го надмина прагот од 5 милијарди. Македонија речиси секоја недела има нови задолжувања, додека капиталните инвестиции бележат пад, па во првите два месеци забележани се само 17 милиони евра капитални инвестиции.
Во јавноста гласно се поставува прашањето за што се трошат парите од задолжувањата, кога капиталните инвестиции се на очајно ниво.

Паѓа просечната плата

Платите на граѓаните се во слободен пад. Просечната плата во февруари е за 867 денари пониска од платата во февруари. Пад на платите се бележи во сите клучни сектори во економијата.
За 9.9% е падната платата во рударството, 6.3% во секторот за снабдување со електрична енергија, 11.7% пад бележат платите во транспортниот сектор, додека во секторот земјоделие платите паднале 6.11%, а во секторот уметност, забава и рекреација падот е 26.4%.

Македонија е единствена земја без раст на БДП во Европа

Проекцијата на Светска банка за раст на БДП на Македонија во јануари оваа година изнесуваше 3,2 проценти, додека во пролетниот извештај таа е намалена на 2,3 проценти.

Покрај падот на проекциите за раст, Македонија има и најниска прогноза за растот на БДП од сите држави на Западен Балкан. За Албанија има проектиран раст 3.6 проценти, за Босна и Херцеговина 3.2 проценти, за Косово 4.8, за Црна Гора проектиран е раст од 2.8 проценти, додека пак за Србија проектираниот раст е 3 проценти.

Инаку, во извештајот на Светска банка објавено е дека Македонија нема никаков раст на БДП, иако министерот за финансии првично најави дека растот ќе биде 2.2 проценти, а подоцна Владата истиот го ревидираше на 1.6 проценти, за на крај државата да нема никаков раст.

Ниско место на листата на индексот на корупција на светските листи
Индексот за перцепција на корупцијата на Транспаренси интернешнл покажува дека бавно оди сузбивањето на корупцијата на Западен Балкан. Од регионот најдобро рангирана е Хрватска, која е на 57 место, а најлошо рангирана е Македонија, која е на 107 место во 2017, за разлика од 90. место во 2016 година.
ВМРО ДПМНЕ наследи земја која беше на 105. место во светот по индексот на корупција, за да ја донесат на 62 место. Сега со политиките на актуелната власт земјата повтроно се турка кон дното.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.