Македонските иселеници се патриоти кои само за викенди излегуваат на протести во интерес на македонските интереси; неуки и неписмени луѓе кои одамна заборавиле на Македонија а сега ги бранат името и јазикот…ова се само дел од бројните навреди кои дел од приврзаниците на актуелната власт ги упатија по вчерашните протести на илјадниците Македонците во Македонија и уште 15 држави во светот, кои излегоа во одбрана на национални интереси. Потребен ли ни е непријател однадвор или доволно силен и непобедлив непријател сме си самите ние…
Изненадени од ваквите навреди и осуди дека немаат право да застанат во одбрана на својата татковина, велат ние сме Македонци колку и да сме далеку оттаму, реагира глобалниот координатор на движењето Ние сме Македонија од Вашингтон, Ана Дукоска.
Никој не може да ни го скрати правото да протестираме и да го кажеме нашиот став околу дипломатијата која се спроведува на штета на името, јазикот и идентитетот, велат Македонците од Австралија. Прашуваат дали нивниот најголем грев – да ја сакаат Македонија е причина за ваквите навреди.
Сплотени под македонско знаме илјадници Македонци вчера излегоа на мирни протести со единствена порака дека Македонците во Македонија не се сами. Упатија порака до актуелната власт дека нема да дозволат да се спроведува дипломатија под диктат, наместо тоа да се обидат да се обедини нацијата.Побараа да запрат преговорите за промена на уставното име.
Инаку движењето „Ние сме Македонија” започна во јануари со симболичен собир пред македонската амбасада во Вашингтон каде за првпат беше објавена декларација со која што се бара итен прекин на разговорите за името и поднесување резолуцијата во Генералното собрание на ОН за признавање на уставното име на Република Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
