Андрија Зафрановиќ, монтажер на „Татко на службен пат“, „Дом за бесење“ и „Балкански шпион“ доаѓа на „Синематик“ во Скопје

Андрија Зафрановиќ е добитник на наградата за животно дело што ја доделуваат Асоцијацијата на филмски професионалци на Македонија и Филмскиот фестивал „Синематик“ посветен на монтажерите.

Зафрановиќ на македонската публика и е познат како монтажерот на „Татко на службен пат“ и „Дом за бесење“ на Емир Кустурица, „Балкански шпион“, а во последно време работеше на три македонски филмови „Деца на сонцето“ од Антонио Митриќески, „Медена ноќ“ на Иво Трајков и „Златна петорка“ на Горан Тренчовски, како и на малцинската македонска копродукција „Устав на Република Хрватска“ од Рајко Грлиќ.

Андрија ќе ја прими наградата во Скопје за време на одржувањето на второто издание на фестивалот „Синематик“ од 14 до 16 декември и ќе одржи мастерклас на 15 декември на Факултетот за драмски уметности во Скопје.

Роден е во Масленица на 15 август 1949 година. Во 1975 година дипломирал на катедрата за филмска и ТВ монтажа на ФАМУ во Прага, каде на други катедри се школуваа познати режисери од поранешна Југославија, како што се: Горан Марковиќ, Горан Паскаљевиќ, Срѓан Карановиќ, Емир Кустурица, Рајко Грлиќ, кинематограферите Предраг Поповиќ и Живко Залар, неговиот брат Лордан Зафрановиќ. Работел како монтажер, супервизор на монтажа и драматург. Со години беше редовен професор и шеф на катедра на Факултетот за драмски уметности во Белград, а од 2009 година е редовен професор на ФАМУ во Прага. Соработувал со режисерите: Бато Ченгиќ, Александар Ѓорѓевиќ, Живко Николиќ, Емир Кустурица, Лордан Зафрановиќ и ја работеше монтажата на целокупниот филмски опус на покојниот Драган Кресоја. Тој има освоено три награди „Златна арена“ за монтажа на филмскиот фестивал во Пула за филмовите: „Кралски воз“ (1981), „Балкански шпион“ (1984), „Вечерни ѕвона“ (1986).

Второт издание на „Синематик“ ќе биде отворен со проекција на филмот „Устав на Република Хрватска“ на 14 декември во киното „Фросина“ во чест на лауреатот. Во рамките на тродневната програма на „Синематик“ ќе бидат прикажани шест филмови во официјална конкуренција во киното „Фросина“ и во Кинотеката на Македонија. На вториот фестивалски ден ќе биде прикажана и двочасовна селекција на студентски филмови од млади монтажери. Во рамки на фестивалот ќе биде одржана и работилница „Концептот на виртуелната реалност во филм“ / The Concept of Virtual reality in Film. Работилницата е во соработка со Македонската асоцијација за развивање игри – МАГДА од Битола, која е единствената асоцијација во земјава што практикува виртуелна реалност.

Фестивалот свечено ќе биде затворен со доделување на наградите на 16 декември во Кинотека на Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.