Заврши прегласувањето во ИМ 2901 во Чаир

Заврши гласањето на избирачкото место 2901 во општина Чаир каде се прегласуваше вториот круг од Локалните избори 2017. Според последните информации од Државната изборна комисија, до до 17 часот од вкупно запишани 719 избирачи на гласање излегле 251, односно 34,9 отсто.

Од ДИК информираа дека избирачкото место било отворено навреме и оти гласањето до 17 часот се одвивало непрекинато и без проблеми.

Првичните резултати од гласањето по електронски пат ДИК ќе ги објави на вебстранцата rezultati.sec.mk по 19 часот откако ќе бидат завршени броењето и сумирањето на гласовите.

По вториот круг на изборите Управниот суд, по жалбата на БЕСА, донесе одлука за повторување на гласањето на ова избирачко место. Разликата во Чаир меѓу Висар Ганиу од ДУИ и Зекирија Ибраими од БЕСА во вториот круг беше 209 гласа, а на избирачкото место 2901 разликата е 66 гласа во корист на БЕСА.

Ова е единственото прегласување на шестите локални избори во Македонија кои се одржаа во два круга на 15 и на 29 октомври

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.