Отцепувањето на Каталонија од Шпанија не само што ќе предизвика економска катастрофа, туку може и да ја уништи Европа, оцени поранешниот француски премиер Мануел Валс во авторски текст за неделникот „Журнал ди диманш“.
– Каталонските лидери и самите Каталонцви треба да знаат дека одвојувањето од Шпанија значи излегување од ЕУ и од Еврозоната. Тоа ќе биде економска катастрофа, која веќе започна со заминувањето на некои компании, наведува Валс, кој и самиот потекнува од Барселона.
Според него, отцепувањето на Каталонија е во спротивност со историјата и идентитетот на народот во каталонскиот регион и може да доведе до распад не само на Шпанија, туку и на цела Европа.
– Тој пат значи уништување на Шпанија, уништување на Европа. Тоа е во спротивност со историјата и идентитетот на Каталонија. Силата на регионот е во тоа што тој во исто време е и каталонски и шпански и европски. Ако му одземеме еден од овие елементи, региониот ќе изгуби дел од идентитетот, оценува Валс во текстот.
Затоа, според него, треба „да се почитува Шпанија и да и се помогне на нејзината Влада“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
