АМС ги повика спортските федерации за конкурираат за финансии за 2013. година

Македонските спортски федерации ќе имаат на располагање за 40 насто повеќе средства во однос на минатата година (вкупната сума е 60 милиони денари) и од денеска можат да конкурираат за средствата што преку АМС ги доделува Владата на РМ. Директорот на Агенцијата м-р Лазар Поповски на брифингот со новинарите и претставници на дел од нашите спортски асоцијации ги соопшти основните услови за учество во конкурсот. Тие се олеснети и е практично само прашање на формалност за подготвените програми на федерациите кои полагаат право на средства.

На средбата, од директорот Поповски заинтересираните добија слика за начинот и критериумите според кои ќе бидат доделувани средствата предвидени со Програмата за развој на спортот во следните пет години донесена на почетокот од годината. Документот предвидува извесни измени со единствена цел-вистинска распределба на буџетот со кој располага АМС. Тоа пред се, значи дека акцент ќе биде ставен на конкретни потфати и области во кои имаме резултати и перспектива. На конкурсот за добивање на средства за субјектите кои реализираат програми од јавен интерес во областа на спортот од Програмата за развој на спортот и младите за 2013 година можат да аплицираат сите постоечки спортски федерации за партиципација во финансирање на:

– Врвниот спорт
– Стручна работа на службени лица
– Стручно усовршување на тренерите кои учествуваат во процесот на работа со спортистите
– Организација на традиционални манифестации
– Прворангираните клубови
– Талентираните млади спортисти

Конкурсот на АМС за спортските федерации што е отворен денеска завршува на 1 февруари, а во текот на март ќе биде објавен и друг конкурс за сите преостанати во нашиот спорт кои не се опфатени со овој конкурс.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.