Малме нокаутиран во Струмица, Вардар е во третото квалификациско коло од ЛШ (видео)

Македонскиот шампион Вардар успеа да се пласира во третото квалификациско коло од Лигата на шампионите откако во двомечот со Малме излезе како победник и со вкупен резултат од 4-2 заслужено може да слави.

По првиот натпревар во Малме каде Вардар извлече поволен резултат од 1-1, во реваншот на стадионот „Младост“ во Струмица „црвено-црните“ го торпедираа шведскиот тим со 3-1. Ова беше прва победа за најтрофејниот македонски фудбалски колектив во Лигата на шампионите по цели 14 години кога во 2003 година беа подобри од ЦСКА Москва.

Ова е година на Вардар, ракометарите покажаа дека може да се покори Европа, а и фудбалерите тргнаа во такво освојување. Падна Малме, сега следат дуели со данскиот ФК Копенхаген во третото квалификациско коло од Лигата на шампионите. Ќе има и долго топло европско лето во Македонија.

Не беше така лесно. Розенберг го доведе Малме во водство во 16.минута, откако реализираше од пенал. Ја искористи резервираноста на македонскиот првак, плашливата игра во првиот дел. Но, потоа Вардар го покажа вистинското лице. Кога не се плаши, може да игра со сите. Грнчаров израмни во 56.минута, а Барсегјан пет минути подоцна донесе и водство од 2-1. На крајот, Николов, по асистенцијата на Блажевски, во 90.минута постигна и трет погодок, за делириум на „црвено-црните“ фанови.

Во следното коло Вардар ќе игра најверојатно против екипата на Копенхаген кој има висока предност од 3-1 од првиот натпревар на гостински терен против Жилина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.